Alima nung kiralongraba ajak nung Pakistan tesentaktep lir: Arun Jaitley

Washington/New Delhi, October 07 (Agencies): Tanü Hokolbarnü Union Finance Minister, Arun Jaitley-i, alima nung kiralongraba tatalokba ajak nung Pakistan tesentakatep lir, aser India-i takok ngua Pakistan-i kiralongraba nung shilem agiba jungkai adoktsüogo, ta ashi.
International Monetary Fund (IMF) aser World Bank senden nung adentsü atema tang Jaitley Washington-i oa lir aser tanü News channel kati interview agidang pai, India-i yimtenren ajanga Pakistan sentoktsü merangba nung takok nugogo, aser tanübo South Asia tesem nung ajaki par linük sentokogo, ta ashi.
“Ajaki (South Asia linüktem) ‘onoki SAARC senden nung madentsü’ ta ashibaji ajanga tesem nung parnok sentokba sayur,” ta Jaitley-i ashi.
“Parnoki kiralongrabaji linük mapatong hadir ka kümdaktsür, aser alima nung kiralongraba tatalokba ajak nung Pakistan nunger tsüngnep lir,” ta paisa ashi.
September 18 nü Pakistan nungi kiralongrartemi Uri nung army camp ka amakba sülen India sepaitemi PoK nung kiralongrartem amakba ajanga linük ana tesentaktep tamajungba kümer aliba mapang ka nung Union minister-i item o jembiogo.
Ano tasüngdangba ka langzüdang pai, “Linük ana ya nuclear tashi aliba linük lir aser alima nung nuclear ajanga amokmerenbaji Pakistan’er mapatong lir,” ta ashi.