Alima nung mezüngbuba pei sasa aniba gari (Taxi) SingaporE nung jajatsü tenzükogo

Alima nung mezüngbuba driver maliyonga pei sasa anir otetba (Taxi) Singapore nung August 26, 2016 nü lapoktsüogo. Alima nung tarutsü lanu putuibo technology amshia senzüsenpongtsü atema-a ayongayonga dang senzütettsüsa temelenshi ibai tetenzüker asütsü akok ta gari yanglurtemi shia liasü.
Pei sasa aniba gari ya nijai tentetba gari yanglur telok tenüng nuTonomy-i Singapore nung yanglu tenzükogo aser ibai alima nung mezüngbuba süa peisasa aniba gari (Taxi) nüburtem atema yanglutetogo. Singapore sorkari nuTonomy dang nüburtem atema tajangzük asütsü asü masütsü-ar tendangtsü mela liasü.
NuTonomy-i mezüngsüa gari tila tabu balala trok yanglua jajatsü tenzükogo. Iba denji külemi Renault Zoe aser Mitsubishi i-MiEV electric garitem tera yanglushiogo. Item gari kilem kolak  nungji Lidar light set terok inoka lir aser iba light jagi gari aoba mapang alongtsü aser ano dashboard nunga camera ana inoka lir, iba jagi traffic light junga reprangtetdaktsür.