Alima nung mobile data dalangtibaji India lir

New Delhi, March 06 (Agencies): Billionaire, Mukesh Ambani indang Jio ajanga alima nung mobile data dalangtiba anguba linükji India lir; kong data 1GB ji sen 18.5 dang lir, ajisüaka alima linüktem average nung 1GB data ji sen 600 shi lir, ta Cable.co.uk ajanga metetdaktsü.
India nung gigabyte (GB) 1 jenjangji 0.26 dollar dang lir saka UK nungbo 6.66 dollar aser US nunga 12.37 dollar lir, ta aliba linük 230 nung mobile data jenjang medemdangba study ka ajanga metetdaktsü.
Alima nung 1GB average jenjangji US sen $8.53 lir.
“Lanur nütsüng jenti aliba aser technological awareness kanga aliba linük, India nung smartphone market tulu lir aser tetoktepertem aiaka lir. Anungji yangji mobile data jenjang kanga dalang,” ta study ajanga metetdaktsü.
India nung smartphone amshir million 430 dak tema lir aser alima nung smartphone market tulutiba linük, China sülenbo tanabuba jenjang nung India lir.
2016 küm Mukesh Ambani-i 4G phone service Jio tenzükba ajanga telocom company tem tsüngda tetoktepba kanga liasü. Iba mapang nungjagi Jio-i tang tashi nung customer million 280 nguogo.
Jio-i jenjang dalang agi service agutsüba ajanga tanga telocom company temia jenjang ajemtsüsa akum.
Jio ajanga Ambani-i Forbes World’s Billionaire list nung jenjang 6 tashi tua alima nung takartiba jenjang 13buba akum.
Arishi küm 61, Ambani indang rongsen 2018 küm US sen billion 40.1 (alima nung takartiba jenjang 19buba) jenjang aliba nungi 2019 küm billion 50 ajanga jenjang 13buba kümogo.
Mobile data jenjang dalangtiba anguba linükji India lir, iba sülen Kyrgyzstan (1GB nung sen $0.27), Kazakstan ($0.49) aser Ukraine ($0.51) linüktem lir.
Ano alima nung mobile data jenjang tasaktiba linükji Zimbabwe lir, aser iba linük nung 1GB data ji US sen 75.20 shi lir.