Alima nung nung tambutisang Indonesia nung süogo

May 1, 2017 (Agencies): Arishi küm 146 tain Alima nung tabutisang Indonesia nunger ‘Central Java’ nung par yimdak süogo.
Pa küli kaktetem ajanga ashiba agi, ‘Sodimedjo’ shiba dang ‘Mbah Ghoto’ taa ajar pa 1870 küm December ita aso.
Aji saka Indonesia nunger-i 1900 küm nungiang nisung asobatem züludena ayutsü tenzük aser tanga mapang nunga iba dak sendakba nung aibelena aruogo. Ketdangsaertemi ashiba agi, pa küli kakettem aser pa den sensaksemba nung ajemdaker pa küm ya shitak ta jangjaba osang benertem dang metetdaktsü.
Pa April 12 nü temanga tashimeiti akümba ajanga mozüki nung anepalutsü asoshi anir ao saka anogo 6 dang lir pai kidangi aotsü asoshi rongshiba ajanga pa anir oadaok.
“Pa mozüki nungi meyipa aruba sülen nungi anogo nung sotsü terara dang ayong aser tzüa tera dang jema liasü. Iba sülen anogo isheka dang lir külen nungibo pa masü tashi kecha mechi-i liasü, kechiyong pai chiyongtsü achitsü asoshi nongnanga liasü.” ta par semchir Suyanto-i osang benertem dang ashi.
Yaküm küm osang benertemi pa den sensaksemdang pa arishia aliba tasa ya kechi ta asüngdang dang pa miemba nuburtemi anepaluba ajanga lir, ta langzü.
Akümli tepeyong pa moko kanga chia liasü aser kinungtsü 4 tashi, adianu 10 aser pa jala jabaso ajak dang nungi pa arishi talangba ali.
Pai ‘Japan’ aser ‘Dutch colonisers’ den raraba indang otsü ashiba ajanga par yimdak pa kanga nüngtugu liasü.
Par semchir Suryanto-i ashiba agi, tebu Hombarnü pai küm isheka tejakdang alia aliba lokti aremdak leper nung remtsüogo.
“Pai aika memeshi. Pa masü tsüngda par kinungertem nem pa joko odaktsütsü asoshi dang shia liasü,” ta semchiri shisem.
Pa küm kanga junga asadangra Ghoto ya France tsür Jeanne Calment dang nungi talangba alisang asütsü. Jeanne ya arishi küm 122 asüdang asü aser tang tashi nung alima nung talangtiba alila ta züngshir.