Alima nung tajungtila

Ojala ya tsürabur ka dangbo masü saka laji obala aser tanurtem ajak asoshi tembar tajungtila lir.
Kidang kibong nung tanurtem tebilemba aser taginüba aika lir saka itemji parnoki aiben obala dangbo meshitetter, anungji parnok taginüba ashidakji ojala dang lir. Aji oda, asenoki asen taginüba ajak shia koma Tsüngrem dang sarasademer yamaji tanurtemi ojala dangbo kecha marendaki shiteter. Khen atema meimba mesüra langka tajangzük angutsü imlaa meimba temeim tapu aika lir saka ojala temeimbo yamaji masü. Ojala temeimjibo teti atema aser meyipa angutsü kecha meimlai meimba temeimji Tsüngrem temeim serbo ojala temeim asütsü. Atangji, ojala oji tetibo tanep masütsüa akok mesüra temeshiba ajakbo lai magütsütsüa akok, ajisüaka la o tetsürokji tangari jembiba o tanep dang nungibo tajungba aser sentiba asütsü aser lai asenok aginüba magütsübaji asenok atema temoatsü rezüngtsür asütsü. Obalatem aikati kidang tanurtem den otsü atonga kazütsü mapang magütsütetter saka ojala asoshibo kidang tanurtem den sensaksema kazüba mapangji mapang ajak dang nungi tajungtiba lir. Aji oda, tanurtem atema tarutsü anogotem nung lia aotsü angazükdak reju tajungtibaji oja den sensaksema kazüba mapangji lir. Tsürabur mapang nungi jembia aruba pei oshi danga alima nung alir ajaki tetsü oshi ta ajar, kechiyong mezüng oshi angazükdak rejujibo ojalaji dang lir. Iba reju nungji asenok kinü asüba mapang nungi tenzüka ojalai asenok dang kinü tanur oshi agi jembia sayur aser tain kümer iba oshiji pei kin oshi küma jembir. Iba amaji asenok ajak ojala den medemer küma mapang tatsüka lir külen temenungratsüka kar kibong küma aoba agi pilar aser karbo tasüba agi pilar. Iba amaji ojalaibo asenok tajung kümdaktsünüba agi la-ang machi aser la-ang magi arema asenok tain küma anitetaka, asenok karibo ojala temeim memetet aser mereprangtet mezüngmeshia amshia alitsüa akok. Ano, talisa asenok kibong kümer külen pei tsüraburtem dang meimnüseta memeimtepba purtema aika alitsü. Aji oda, asenok aikati kibong kümer külen pei tenü-teku dang pei tsürabur ama memeimteter aser pei kinungtsü mesüra pei kinungboji item tsüraburtem jagi timtem jenti agia mesütet ta asenok aikati merajemer. Ibayongji, tanü tsüraburtem aika pei chirnurtema kata mali ama anepalur mali alaashiba jenjang nung angutsü. Iba amaji asenok rongnung kari danga tetsü temeim mereprangteti jashidakja lira, tanü ama tetsü temeim anogo amongba mapang ya la peladaktsütsüsa inyaktsüba mapang tajungtibaji asütsü. Ojala temeim indang aroka bilemdangeri ashiba agi, asenoki ngua Tsüngrem asenok ajak den tetibo melitettsü asüba agi, Pai Pa melen asenok anepalutsü atema ojalatem yok. Iba jagi asenok malangdaktsütsü aser mashilen lenmangi moudaktsütsü asoshi teti ojalai asenok kümdanga mita alir. Shiba südir süang taküm nung teti dangbo takok aser tepela nung malir, idangji asenok süneptsür aser tasü itdakja metongshitsürji ojala lir. Paji asenok lendong aser timtem mapang teyarir tembar tajungtila. Laji asenok asoshi Tsüngremi yokba kotak tenyar lir. Nisung asünungji ojala daka tashimait alitsü saka asenoki jungjunga reprangdangra, ojala dak tamajung aliba dang nungi tajung kanga agia tuluba lir aser la tashimait dang nungi la temeimji kanga agia tashitaitba ta asenoki reprangtettsü. Tangar tsüngdang asenok dak melangaka asen agi tenük sünga jembilaji ojala lir. Lai angashia tangari asen majung jembibaji kenyongi lai manganür. La nükdangbo alima nung tajungtila aser tajungtibaji lar jala jabasotem lir. Iba temeimji masadangtet, anungji meyipa agütsüdi asüyonga magütsütettsü. Iba temeimji reprangteta tanü danga asenoki ojala dang ” Oja, kanga pelar” ta shira, la asoshi ibaji teperi. Lai ibaji dang aginür aser la taküm masü asenok takümang junga lidaktsüner.