Alima nung takartiba nisung 26 indang rongsen ya sensaker tesadangka indang den kasa: Oxfam

Davos, Aenjeti/Jan. 21 (Agencies): Alima nung nisung meimchir sensaker tesadangka indang rongsen den kasa alima nung takartiba nisung 26 ket nung rongsen lir, anungji nisung tsüngta telemsa adokba tajemba kümdaktsütsü mechi takar dang saru tali meshitsüla, ta Oxfam-i Tentonü ashi.
Davos nung World Economic Forum alitsü lia sangdongba report ajanga ashiba agi, 2018 küm alima ajunga nungi billionaire tem ajak senteper anogo shia parnok indang rongsen ya sen billion $2.5 renloker.
Alima nung takartiba, Amazon CEO Jeff Bezos-i taoba küm sen billion $112 aazük aser nütsüng yongsük million 105 aliba Ethiopia linük ajunga atema health budget ya pa indang rongsen shilem ka den sako lir, ta Oxfam ajanga ashi.
Taoba küm sensaker billion 3.8 indang rongsen ya shilem 11 agi tajemba aküm, ta Oxfam-i ashi aser takar o sensaker na tetsüngta tulu akümba ajanga tajemzük tia nung alir ajungkettsü inyakba maparen nung timtem ajurur, rongsenketsüng lenmang raksar aser nüburtem tali jashir, ta shisem.
“Alima ajunga nung nüburtem jashir aser tezü atanger,” ta Oxfam executive director Winnie Byanyima-i sangdong ka nung ashi.
1980 aser 2016 küm tetsüngta nung nisung meimchir tepetzük tia nung aliba tesadang kati dang global income growth shilem 12 ajangtet, aser takartemi shilem 27 agitet, ta report ajanga ngutet.
Sorkartemi healthcare aser education amala nüburtem mapa nung sen tajemba indoker aser takartem dang saru tajemba meshir, ta Oxfam-i tekümdangtsü ashi.
United States nung congress züngsem tasen, Alexandria Ocasio-Cortez-i ita tetenzüklen kangasa takar dang saru shilem 70 meshitsü ken o ka benokba ajanga alima ajungai metet.
Taoba küm takartem dang saru shilem 39.6 meshia aliba nungi Tir Donald Trump-i melenshija shilem 37 meshiba sülen Democratic Socialist nungi iba ken o ya benok.
Europe nung “yellow vest” movement ya kanga sashia tenzüka lir, talisa France nung iba movement ya taoba küm Yimpoksüi/November nungi tenzüka sorkar anema longkak aita arur, aser iba movement nung shilem agirtemi Tir Emmanuel Macron dang takar dang saru ajema meshiba agienang ta akhanger.
“Taka-taitertem ya saru tang tajemba menoker aser tesayur maliba tanurtem aser mozü ayokdak mozü maliba tebilemtsü ya onsara tulu,” ta Oxfam ajanga ashi.
“Mapang ka atema agütsüba private service ajanga sensakertem tali timtemdaktsür aser takartem ajangzüker. Temang anepalutsü asoshi jenjang tali meshiba ajanga anogohia nisung 10,000 asür,” ta parnokisa ashi.
Jangratemtsü Swiss ski resort jila nung alima ajunga nungi takataiter aser nüngtugu nisungtem adenshiba mapang iba osang ya sangdong, koba ajanga taka-taiter tem dang saru ajema meshiba anentsüla, ta ajungshir.
Takartem dang parnok indang rongsen nungi saru shilem 0.5 meshiba ajanga tanur million 262 nem education agütsüba nung indokba dang timba bendentettsü aser healthcare tajungba agüja nisung million 3.3 kümzüktsü, ta Oxfam ajanga bushitet.