Alima nung tambutisangji arishi küm 112 tain Masazo lir

Tokyo, Rongchii 10 (Agencies) : Japan nunger arishir ka tenüng agi Masazo Nonaka tang alima nung aliba teburtem rongnung tambutisang lir, ta tanü Sangtennü Guinness World Records ajanga kuli agütsüogo.
Nonaka shiba July 25, 1905 nung aso, pai Japan anüdoklentip tsütsü aliba Hokkaido asetkong nung par kidang Guinness World Records ajanga renemtsüba kulikaketji agizük.
Küm noklang tema arishia taküm alisang ya tang par kinüngertem den lidagi.
Par semchir tetsür ka tenüng agi Yuko Nonaka-i ashiba agi, “Talungtsü aketba menden ka nung pa mener oliorar saka temang jibo junga dang lir.”
“Pai nanglong ta asübabo ajak chiner,” ta AFP osang den jembidang laisa metetdaktsü.
“Pai anogoshi osangkaket azünger aser tzü talem alidak temang metena kazür.”
Par adianutemji pa den ano tebur tenet aser tetsür ka lir; parnokji talangkabo mepilai Hokkaido kübok Ashoro jila nung lidar.
Guinness World Records ajanga ashiba agi, pa 1931 küm Hatsuno den kibong aküm aser tena chir pongu lir.
Spain nungi tambur ka tenüng agi Francisco Nunez Olivera shiba arishi küm 113 junger lia February ita nung süogo, pa melena tang Nonaka-i iba maongka ngutetogo, ta GWR ajangasa metetdaktsü.
Jamaica nungi Violet Brown arishi küm 117 junger lia yaküm 2017 küm July ita nung süadokba sülen tang alima nung arishi talangtiba alisangji shiba asütsü ta Guinness World Records nung inyakertemi bushia jajadagi.
Japan nung alirtem ya teimba arishia alirtem dang lir aser talangtiba arishia alir nem agütsüba naroküm angur aika lir; parnok rongnungji arishi küm 116 junger lia 2013 küm June ita nung asüsang Jiroemon Kimura densema lr.
Osang ajanga ashiba agi, arishi küm 100 shi mesüra iba dangji talangba arishia alir parnok 68,000 shi liasü, ta yaküm sorkari metetdaktsüogo.