Alima nung tang mezüng, Netherland nung tanishir maliba bus senzür

Amsterdam, January 28 (Agencies): Tanü, Brehostibar nü nungi tenzüka Netherlands nung tanishir maliba electric shuttle bus yimti yimdong tendanga jajadaktsüogo.
Alima ajunga nung tan mezüngsüa, WePod ta ajaba tanishir menüngdakba bus-i nisung 6 anir metre 200 tashi tanü tendanga jajaba osang jangjaogo.
Tarutsü mapang nung WePod bus garitem ya Netherlands tiyongtsülen, Wageningen jila nung nüburtem anir jajatsütsü tebilemba lir.
“WePod bus gari-i ghonda nung kilometer 8 kara jajateter aser ibaji kanga tekarabo masü. Ajisüaka, tanü jakdangbo tanishir menüngdakba nübur anir senzütsü garitem yimti yimdong nung ken danga jajadanga mali,” ta WePod shuttle bus gari mapatong nung technical director, Jan Willem van der Wiel-i metetdaktsü.
Tanü tendanga senzüdaktsüba WePod amala tanishir menüngdakba gari tanga balala Tesla, Google aser Daimler teloktemia alima tesem balala nung tendangtsü tenzüka lir.
“Tan tendanga jajadaktsüba WePod amala garitem yimti yimdong nung jajaba ajanga meimchirtemi anisüngzük tulu angutsü imlar,” ta Wiel-i shisem.
Tanishir menüngdakba semi-truck garitema Netherlands tzüyimkümlen tentetba Rotterdam yimti nung taküm April ita tendanga jajadaktsütsü sentong lir.
Tan tendangba WePod bus gari ya Delft Technical University-i dollar sen million 3.3 shi endoka yangluba osang jangjaogo.
Tarutsü mapang nung iba gari-i ghonda nung kilometer 25 tashi kara jajadaktsütsü nükjidong yua lir.