Alima nung tayimtsü tulutiba India nung anenzüktsü

New Delhi, May 11 (Agencies) : Tan mezüngbuba atema alima nung tayimtsü tulutiba India-i arutsü sentong lir. Iba tayimtsü indang tenüngji Mriya lir aser ibaji Russia nunger oshi nung pungmang lir.
Ukraine nung yangluba Antonov An-225 ‘Mriya’ tayimtsüji Hyderabad nung aliba Rajiv Gandhi International Airport nung anenzüktsü. Prague nungi Perth, Australia-i aoba tayimtsüji technical mapa atema India nung anenzüktsü.
Iba tayimtsü nung Australia nung mining company ka atema 117-tonne power generator ka bener arutsü.
Prague nungi Turkmenbashi-i aoba sülen Hyderabad nung anenzüktsü aser India nungi apusoa aoba sülen ano Jakarta nung khen anenzüker ang Perth atongtsü.
Alima nung Mriya tayimtsü ya ka dang lir aser iba tayimtsü nung khen nung 640 tonnes touzük benteter. Tayimtsü indang tashikangji football asayadak moapu ka shi talang lir. Ajisüaka, tayimtsüji kilometre 4000 yima aoba sülen totzü enoktsüsa akümer.
Antonov An-225 ‘Mriya’ tayimtsü anenzüktsü atema India nung tayimtsü anendak balala asadangba sülen Hyderabad shimtet. Parnoki runway length, technical facilities, air traffic density aser trans-continental air-route anasa aliba reprangdanger Rajiv Gandhi International Airport nung anenzüktsü shim.
Osang ajanga ashiba agi, May 13, 2016 nü Hyderabad nung Mriya anenzüktsü.