Alima nung temang tarettila surgery agitsü sen lakh 20 nüngdaktsü

Mumbai, December 09 (Agencies) : Alima nung temang tarettila Iman Ahmad Abdulati ya taküm piyong temang kangasa uluba agi timtema arur. La taküm kümzüktsü atema Mumbai nung arua surgery agitsü atema sen aikasa nüngdaka lir.
Egypt nung la temang tuozük seret 500 lir ta ashir aser ibaji ajanga la air ambulance nung masemer. Anungji la Mumbai-i anir arutsü atema lar kinungertemi sen lakh 20 intoktsüsa akümtsü. Mumbai nung aliba Dr. Muffazal Lakdawala-i la surgery agitsü atema mulungogo.
“Timtem aser mulung melemtep madoktsü atema onoki Imam tenüng nung bank account ka lapoktsüdar. La atema tenlartemi parnoki tenlaba sen koma amshir itemji kanga junga metettsü. Lar kibongi matutsü asüba agi surgery aser anepaluba ajak angadi sütsütsü renemogo,” ta Saifee Hospital indang Institute of Minimal Invasive Surgical Sciences & Research Centre Hospital nung mendenbuba Dr Lakdawala-i ashi.
Osang ajanga ashiba agi, Abdulati ya temang kanga uluba agi küm 13 tashi yipten nung dang alir aser Mumbai-i arutsü atema teti langka tetsükdangtsü kabosa adoker.
Abdulati atema medical visa yanglutsü atema tetsüdaktsü aika adok kechiba süra la indang temoyong nemloktsü atema la kidang nungi pila moteter ta ashibaji embassy nung ketdangsertemi mamang, ajisüaka Union Minister for External Affairs, Sushma Swaraj tebang ia la nem visa yanglutsüogo.
Tanabuba nung la anishitsü atema tayimtsü angutsü nung timtem adok. Doctor temi air ambulance dang asüdang ajisüaka kishi nung la temang masemer anungji commercial tayimtsü nung tajungba asütsü. Commercial tayimtsü ponglanglen la atema menden 9 azüngtettsütsü aser tera yanglushir la indang stretcher ayutsü, ta Dr Lakdawala-i Egypt nungi Abdulati tayimtsü nung bener arutsü atema ashisang Ambucare nungi Dr. Samir Gokani-i ashi.
“Abdulati Mumbai-i bener arutsü atema ni telok ka tentetogo. Kü teloki Jet Airways, Air India aser Egypt Airways tem dangi onok yariang ta shia shidi ka züluogo. Ano la oli aruli anishitsü atema sorkar danga teyari meshitsü,” ta Dr Lakdawala-i ashi.
Air India-ibo parnok tayimtsü Egypt nungi Mumbai tashi ayimba kata mali ta shiogo anungji Jet Airways aser Egypt Airways na ang anünga lir kechiba süra len tom nung aiben la tayimtsü melentepa anir arutsüji staff tem atema kanga timtem asütsü.