Alima nung Tetsü Oshi Anogo February 21

~ C. Walu Walling.

(Ao oshi meima Ao oshi renlokdaktsütsü meranga bushiyonga aruba Aor ka ama Ao kin dangi temulung nung runga bilemba kar lemsateper. Kari yabo tim masü ta bilemra iba ocet mezüngi dang tokjangma)
Okila: Tetsü oshi ya iba lima nung dang jembia, sayua, zülua, angazüka, bushiloka otettsü. Iba lima ajangerbo shingaia pei tetsü oshi mejembitsü aser mebushitettsü. Abenjagi Tetsü meli nungi adokba o temji koda senti aser ya koma kodaser renlokdakja angazükdaktsütsü ta United Nations-i sentong tajung yanglua agitsü lemtetetbaji koda tajung. Taoba küm Alima Lisopur Anogo den peta Tir Yimyim ajanga Dimapur nung sentong tajung yanglua agiogo.
Taküm atema Tsüklai metsürka dangji Alima nung Tetsü Oshi Anogo ta sangdonger lokti balalai pei dak apet sentong tajung yanglua agitsü renemdar südi. Anogo ka atemzüka yur Tetsü Oshi koda tongtibang, aser ya kodaser tajungba kümdaktsütsü ta bilembaji junger. Ano o ka nung, tetsü oshi tajungba kümdaktsütsü sentong balala yangluba dang nungi tetsü kati asoba chirnur ajaki tetsü oshiji jembia zülua bushilokba jagi ang tetsü oshiji renloktsü ta angatetdi.
Alima nung sama-a aoba aser samatsü anasa aliba oshitem rongnung mekümdangra Ao oshi adentsü memenu ta aikati jembiba angashia arudar. Tip külen ajia shitak asütsü südi. Kechiaser Aor Aotsürisa pei tetsü oshi mejembinüba. Iba melenabo kibong nung apuani, tsürabur aser tanur tsüngda Nagamis mesüra Englishi agi ang tebilemba tajungba tajungba jembiteter ta shia parnoki aji oda jembir. Yamaji dangsa jembitepra, aser tetsü oshiji mesenmetura asenoki asen tetsü oshiji mesamadaktsünüyonga samalanglang.
Aorji shir, parnok dang kechiba Aor aja, parnok kechi shilu, parnoki kechi oshi jembir, ta asübaji Naga nungeri dang masü, alimai memetettsü tensai bener arubaji koda? Khen mapang kabo parnokji samanir sür lia aru, saka tangbo parnok kinji kechi küma aoar ta item kin jagi parnok rongnung asüngdangteptsü.
Social media created group NCERT Books for UPSC Exam (For NorthEast Aspirants). Iba telok nungi NCERT kakettem class 6 nungi 10 aser iba tema kakettem azüngtsü tuyuba den class 11 aser 12 atemabo History kaketji TAMIL NADU STATE EDUCATION BOORD Kakettem ang alia züngang ta tuyuba angutsü. Yamai:
“Uploading NCERT HISTORY BOOKS for all from class 6
to class 10….. For Class 11 and 12, it is not NCERT Books,
but TAMIL NADU STATE EDUCATION BOARD BOOKS”
Ni iba History kaketji download ser züngdang nung Indian History nung agiba Pre-history section nung Harappan and Mohenjodaro Civilization (tangbo tenapronglaji Pakistan nung dena lir) züngshi. Onok mapang History subject class 5 nung iba indang azüngba bilemteta liogo.
Kasa atemajisa section karbo Arunachal Pradesh Education Board-i adokba kaketa kar tuyuba ngua temulung nung tasüngdangba aika arua repranger toktsüogo. Memenui Nagaland nungi adokba SCERT kakettema karbo enoksemtsü südi. Saka tia ka-a SCERT ajanga adokba kakettemji dendaktsü nungbo Ao kin otsü medeni itemji tangari azüngtsüsa mapangi bener arutsüogo. Süra Alima nung Tetsü Oshi indang bushiyonga aodang Ao kini jembiba oshiji züluyu makaba tebang o ka dang küma aotsü temela. Anungji züluyu makaba tebang o kaji samatsü kanga temela asütsü masü no!
Küm ishika tejaklen Naga nunger oshi karbo 6th Scheduled nung dendaktsütsü kibok mapa ajak renemer tatembang temelaba agitsü atema Delhi-i yoker aliba anarongtena sota aliba osang ajaki angashir südi. Ibaji agizüker ali asübo, Naga nunger rongnung iba oshi jembirtembo UPSC, NPSC, aser tanga tatidang ajak pei oshi nung agüja jenjang tajung nung lila. Idangjibo tanüngba Naga kintemji kechi jenjang nung alitsüa ta bilemer?
Ao kin dak tangatetba shisarajemer aikabo mali. Tangari inyaker aliba ka dak tai aputsü aser pi shisatsü shipakshiri sayutsübo asen kin daksa sempet tajungtiba keta lir. Kasa Naga nunger kintema koma ajongshitepa tajungba yanglushia pei tetsü oshi renloka aor, item indang talisa Naga nunger yimtiba Kohima nung alir Aor lenirtemia langkabo nguteta lenmang sayur asü masü. Aji oda Dimapur aser Aor yimtiba Mokokchung nung alir senso tajungtemi kechisa bilemer.
Olen ka nung, Chakhesang nungerbo tongtibang kin ta azüngba nungbo kin ka dang, saka oshi tsütsübo parnok oshi ana: Chokri aser Kheza Nagaland Sorkari agizüker school nung azüngtsü kaket adokbaji koda. Anungji parnokbo Textbook branch nung Language Officer ka Language Asstt. Officerbo ana: Chokri aser Kheza ta shimer inyakba jagi par kin tetenzükdak nungi tang tashi otsü alima dang züluyu nung metetdaktsütsü.
Taoba küm tom ka nung Naga nunger aruba otsü linük tenzüker Meyu Longkumer-i Tiryimyim Olemsabang nung lemsatepbato tazüngeri kechi bilema dang zünger yutsü. Ao kinbo kong nungi koma lia aru, itemji tongmelang oren aser taren ishika nung danga zülur Naga nunger pei pei kin otsü azüngba nungji densemdaktsü asübo tanü asen kin nung tanishirtemjia tangar kin amaji tejak tenteta lila.
Ao oshi nung kibur kümtepba/kümdi ta asüba, ozü yimeribo yamai ang jembir/zülur, ya ang shitak, ibajibo tai ta aitsütepba yagi Ao oshi Rajang kümdaktsüba nung shilem agir ta metetdi. Mekümdangra Ao oshir jembir lokti ana asem tsüngda telemsa adoka pei-i jembiba ama zülutepa aotsü mapang arutsü. Akhidangbo Yimchungrü kin ta dang jembia aru, saka tangbo Yimchungrü aser Tekhir ta lemsar Sorkar dang masü Arogo Mungdang tashi nung mepetmesü adokbaji ajaki meteta kar. Ao kin nunga Jungli Mongsen tsüngda oshi nung mangatettep adokmesora ibaji shingaia meremseptettsü.
Tanabuba nung Ao oshi renloktsü atema sabang aika nung jembiba aser telemtetba agiba osang züngshia tip külenbo pelar, saka ibaji shirnoki mapa kümdaktsütsü ta asüdangbo telemtetba ajakto kecha magi ama kümdaktsüra, kecha melemtet tajungba. Arem mesüra min wazüka ayuba ama dang Tetsü Oshiji wazüka ayutsü asü, mesüra iba nung aliba rongsentemji arangteta jembia, zülua, züngdakja, bushiloka aoba ajanga alimai hau ta shitettsüsa inyaktsü.
Dimapur Ao Lanur Telungjem Oshi-Oben Luden ajanga Ao Kaket Riju tenzüka tanurtem dang tetsü oshi sayudaktsüba sentongji kanga junger, saka ya Dimapur Ao Baptist Arogo kisüng nungdang masü Dimapur nung aliba Ao arogotem ajak nung agitsüsa lenmang tuyuteptsüla. Sentongji junger ta agizüktetra Kohima aser tanga jakatem nung alirtemia pei lokti den apet yanglushir sayudaktsütsü koda.
Lepshia jembiba olen ka: Aorji kin ka tasa alima dang sayudi süra, mezüngbuba nung SCERT ajanga adokba kakettem nungji Aor lipok otsüji tongmelang agi zülur züngdaktsütsüsa lenmang bushitsüla. Tanabuba nung, Ao Oshiji B.A. tashi nung major subject ama azüngtsü NU-i melabaji jenjang tajung ka tenzükogo. Saka iba nungji dang anena meli-i tanabuba tasembuba jenjang tashi AO Oshi Nagaland University nung agitettsüsa shisalen tuyuteptsü nüngdak. NU nungi temelaba mungutetra, ano tanga Deemed University kar den tesendaktep yanglua yur Aor Aotsür lanurtem nem Tetsü Oshiji angazükdakja sayudakja renlokyonga aotsü lenmang bushitsüla.
Item sentong tasentem inyaktsü atema nübu tali nüngdaka akümtsü. Mapa awajema inyaktsü atema pi jilo mereprangyonga asen maparen den apet Nüngjaka yangteter, tenüng nung jaloka Tetsü Oshi bushilokba aser angazükba tasa bushiloksemtsü. Aon majung nung aonpo dena ajongtoktsü na ta jembiba ama, aonji dang entokashi, asen teti aon asoba pojibo kümzüka ayutsüla.
Kodang itemji inyaktsü apumesodir, Ao kin külemi jangyu medemtsü tenzüktsü aser tesendaktep raksar aliba süshia, temeim mokonga kümer aliba süshia, mesüra meputepi aliba süshia Tetsü Oshiji ajanga yimjung, teputep aser tepela nung iba kinji mera tasen agitsü mapangi senpettsü.