Alima nung WhatsApp amshir billion 1 akümer

New York, February 02 (Agencies): Alima ajunga nung mobile messaging app, WhatsApp amshir nisung billion ka tanü, Mongolbarnü akümba osang ka WhatsApp teloki metetdaktsüogo.
“Taoba ita 5 tsüngda nung WhatsApp amshir nisung million 100 densemba sülen tanü tashi nung iba application amshir nisung billion 1 kümogo. Ibaji alima ajunga nung nisung 7 nung nisung kati ita shia WhatsApp amshia pei kinünger, medemer aser temeimtepertem den tongteprateper,” ta par teloki ashi.
Tongti social networking site, Facebook-i 2014 küm February ita nung WhatsApp ya dollar sen billion 19 agi alizüka liasü.
“WhatsApp amshirtemi anogo shia message billion 42, noksa billion 1.6 aser video million 250 lemsatepba osang bushiteta lir,” ta WhatsApp tenteter, Jan Koum-ia Facebook ajanga metetdaktsüogo.
“WhatsApp ya Brazil, India aser Russia nüburtemi kanga dang tsüratema amshir,” ta shia, WhatsApp amshir rongnung telok billion 2 shi tenteta aliba osang ka paisa metetdaktsü.
Alima ajunga nung India linük nung alirtemi WhatsApp ajanga noksa timba lemsatepba aser WhatsApp telok timba tentetba linük tarensen nung India tanabuba jenjang nung aliba osanga jangjaogo.