Alima rongsenren khuret nung India densema mali: Modi

Deobarnü New Delhi nung aliba Jawahar Lal Nehru stadium nung Prime Minister Narendra Modi-i Maharishi Dayanand Saraswati asoba anogomung sentong ka nung o jembiba angur.
Deobarnü New Delhi nung aliba Jawahar Lal Nehru stadium nung Prime Minister Narendra Modi-i Maharishi Dayanand Saraswati asoba anogomung sentong ka nung o jembiba angur.

New Delhi, February 14 (Agencies): Tanü alima ajungalen rongsenren tsütsü khuret liaka, iba ajanga India-bo timtem majurur aser iba ya sorkari asalentong shitak inyakba ajanga lir, ta Deobarnü Prime Minister Narendra Modi-i ashi.
“Nisung ajaki yamaji ashir… World Bank, IMF nungeria yamaji ashir. Tang alima nung rongsenren khuret ajurua lir saka India dang terenlok nguyonga odar. Alima nung rongsenren jenjang mejungi akümdang, India-bo rongsenren tsütsü inlokba tensa ya khenyongi balaka lir” ta Modi-isa ashi.
Tanü Jawahar Lal Nehru stadium, New Delhi nung Maharishi Dayanand Saraswati asoba anogomung nüngtem nung agiba sentong ka nung Prime Minister Modi-i iba onük jembi.
“Sorkari sentong balala atonga inyakba ajanga alima nung India ji ‘fastest growing economy’ ka lir ta nisungtemi jembir. Terenlok ajanga dang asen khurettem koktettsü aser shisaliok jenjang ajungkettsü” ta paisa shisem.
“Nisung crore ana den timba MUDRA Yojana ajanga tajangzük nguogo aser parnok nem sen crore lakh ka den timba lema agütsüogo. Parnok nem senotsü teyari agütsüogo aser onoki parnok dak tamang akar” ta prime minister-isa metetdaktsü.
India linük nütsüng yongsük noklang nung shilem 60 ji arishi küm 35 ser teküpokpurtem dang lir aser iba jagi India ji alima nung linük tanubosang lir, ta Modi-isa ashi.
“Sorkari lanur tashi amshitsü atema alizüng ayur aser iba jagi linük renlokba nung teyari angutsü. Anungji, iba nung ajemdaker onoki ‘skill development programme’ dang masü saka ministry tasen ka tentetogo” ta Modi-isa ashi.
2030 tashi nung tanga linüktem nung nütsüng yongsük kanga tain kümer alitsü aser parnoki ‘work force’ nüngdaktsü. Iba mapangji India-i item linük nem teka mapa aser technical mapa shia alirtem nübo ajanga tashi agütsütettsü, ta paisa shisem.
“Lanurtem ket nung kulikaket aliba dang masü, mapatem shia metettsüla. Lanurtemi langka ka shimtetang aser iba nungji tajung akümtsü merangang. Nai shimba langka jagi alima nung India tashi itdakjang” ta Modi-isa lanurtem ayongzük.
Jan Dhan Yojana indang jembidang Modi-i ashiba agi, iba scheme ajanga account tem nung sen crore 30,000 enokogo.
Sensakertemtem rongnung sensaktibatem bank nung account lapokdaktsütsü nükjidong nung Jan Dhan Yojana tenzüka nübortem dang ‘zero balance account’ lapoktettsü ta sangoktsü. Linük nütsüng yongsük nung shilem 60 tashi bank account malirtem liasü, aser onoki zero balance account lapokdaktsütsü telemtetba agi, saka nübortemi item account nung sen 5 nungi 10 tashi enok aser tang sen crore 30,000 tashi bendena lir, Modi-isa ashi.

You must be logged in to post a comment Login