Alima shisashir dang nungi parnok shisa takaba liasü

Item shisatsü balaka liasü.
Tsüngremer shisa taka nisungji alima shisatsü nisung dang nungi balaka. Parnok nungi petinu samar külen, shisa kartemi tasen chuba indang kong soa lir tali asüngdangtsü mulungtet. Atangji parnok dang tasen Chubaji Yirusalem angutsü ta shir alitsü. “Yihuda nunger Chubaji kong soa lir,” ta asüngdanga parnok aru (Matt. 2:2).
Yirusalem nung alir ajaki tasen chubaji külemya alitsü ta parnoki bilemer alitsü südi. Saka yamaji masü liasü. Kodang Herodi iba osang angashi pa tipmatem (Matt. 2:3).
Yirusalem nung alir shingaia Messiah asobaji bilema mali asü. Kodang Herodi putirtemi dang tasen chubaji kong asotsüla ta asüngdang, parnoki Laishiba nung bushitsü tenzük. Tejen Lai nung yimsü nung tesayurtemi Khristaji Yihuda nung aliba Bethlehem nung asotsü ta ratettsü (Matt. 2:5).
Saka item shia akartemi shitakba telangzübaji agütsü, yimsü nung lenirtemi parnok temetetba liaka parnoki kodanga Yisu majuru. Tezülurtem aser putirtemji alima shisa akartem noksa lir. Parnok metet saka kecha meinyak! Anüdoklen nungi aruba nisungtemji shidakba Tsüngrem shisatsü akartem liasü. Parnoki Pa O amang aser langka inyak. Parnoki iba jagi mapa inyak. Parnok theologyji teradang, saka parnok tashi angabaji tabensa liasü. Laishibai ashir, petinu tesangwaji kong Yisu soa lir ibaji matong tashi parnok jakdang ao (Matt. 2:9). Tsüngremi parnok Kinü Khrista dangi ani. Kotaker shisatsüji teti alima shisatsü dang nungi temaba.