Alima Tasen Ka – T.Ken 104:31-35

Kodang Yisu Khrista ne Kümtetdakba aser Tsüngrem ne Tebu lidir, kodang Tanela Temeshi ne dak lidir aser Tsüngrem O i na sayudaktsüdir, teyangluba ajak tebur tajung tasen asütsü aser temoatsü tasen alitsü. Anüng sentsü aser alima sentsü tajungba asütsü. Nai teyanglubaji dangbo mangutsü; nai Teyanglujia angutsü. Aser nai Teyanglurji dang masü; nai Kotaker Tebuji angutsü, shibai na anepalur. “Ni taküm ali tashi Kibuba dang ni ken tenyutsü; kü dak taküm alidang ni Tsüngrem dang ken atentsü. Kü teshisadangba Pa madang taginütsüsa süangma. Ni Kibuba nung pela shishia alitsü” (t.33,34). Ken züluri Tsüngremi yangluba ajak shisadanger iba ken ya zülu. Pai tzütem, tenemtem, ayongnutem aser ayongtem ayimba reprang. Ozütemi süngdong rongnung ken atenba pai angashi. Pai nashi telok rem mejakba angu. Pai nisungtemi totzü aser amtsük yangluba angu. Pai anü adokba aser aiba ajia ali. “Item ajak angur südi?” ta Pai ashi. “Ni iba Teyanglur, shiba Kü Tsüngrem ni PA dang pelaa alitsü.”
Temenen ajanga teyangluba ajak timtema alir (Rom 8:22). Saka asen Teyanglur Kibur lir, temenen liaka, Pa teyangluba nung maneni tebur tajung aser rongsen lir. Tsüngremi Pa teyangluba nung pelaa lir ta nai metetter ma? “Kibuba sentsüwangshi teti lidakjang ama ! Kibubai pei mapa nung pelashishia liangma” (t.31). Pai ozütemi ken atenba nung pelar. Pai ayongtem ayimba nung pelar.
Asenokia Pa mapatem nung pelatepdi. Aser tanü asenoki Pa dang tashi angaba agi Pa sentsüwangshidaktsür ta pelatepdi.
Pa mapatem ajanga Tsüngrem sentsüwangshir, kechiaser parnok ajanga Pa uluba sayur. Nai teyanglubatem angu dang, Pa uluba angur asü? Pa mapatem Pa pelashishia aliba ama, Pa den Pa mapatem nung pelatepang. “Kibuba teti pelaang. Tanabena ni ashi, pelaang !” (Fil. 4:4).