Alima tashi abenba linük lenirtemi otsüsütsüsüa aibelener: Netanyahu

Jerusalem, July 14 (Agencies): United States-i aniba alima tashi abenba linük lenirtemi Iran den tan nuclear tezüngzüktep agiba ajanga otsüsütsüsa aibelenogo ta Israel Ato Kilonser, Benjamin Netanyahu-i tanü Mongolbar nü metetdaktsüogo.

Netanyahu-i tanü Jerusalem nung Netherlands Foreign Minister, Bert Koenders den senden ka amenba jakdang iba olenji metetdaktsü.

“Iran-i alima tashi abenba linük lenirtem den nuclear tezüngzüktep agiba ajanga par linüki tongpang nung amshitsü nuclear osettsüset yangla rizüngtsü maongka ngutetogo,” ta pai ashi.

Paisa ashiba agi, “Iran den nuclear tezüngzüktep agiba ajanga alima tashi abenba linüktemi Iran anema taoba mapang benokba tenokdangba sentongtem agientsü aser kasaji agienba ajanga Iran-i sen billion jenti bendentettsüsa lenmang sadema lapoktsütsü.”

“Iran-i senji bendener külen kasaji amshia tongpang nung amshitsü nuclear osettsüset yanglua alima nem timtem tulu bener arutsütsü. Ajisüaka ozü Israel-i Iran nokdangtsü asoshi nungdakba maparen inyaktsü renema lir” ta pai ashi.

“America nem tasüba bener arutsütsü” ta ola tulu adoka amokmerener dangi lenji tali aoba ajanga alima tashi abenba lenirtemi tan kanga sashia aibelenogo ta pai shisem.

Alima tashi abenba linük lenirtemi Iran den nuclear tezüngzüktep agibaji Iran nem ‘Tepsettsü temeten’ agütsür lir ta Israel Culture & Sports Minister, Miri Regev-ia tanü kanga jashia metetdaktsüogo.

“Iran den tan nuclear tezüngzüktep agibaji West lenirtemi Iran nem bendanga agütsür lir. Ajisüaka, tan agiba tezüngzüktep takok ngua meinyadaktsüi nokdangtsü asoshi akok tashi inyaktsü nangzüker,” ta Isreal Deputy Foreign Minister, Tzipi Hotoely-ia metetdaktsü.

Israel-i taoba mapang nunga par mitkar tashi amshia Iran-i tentetba nuclear osettsüset yangludak ajunga poksatsütsü amokmerenba osang bushiteta lir.

Britain, China, France, Russia aser US den külemi, Germany densemba P5+1 teloki küm 13 tejaklen nungi tenzüka Iran’er nuclear sentong anentsütsü asoshi maparen inyaka arur külen Iran den tan tatembangsüa nuclear tezüngzüktep takok ngua agiogo.

Iran-i par nuclear sentong taruba küm 10 tashi anentsü nangzükba melena P5+1 telokia Iran anema benokba tenokdangba sentongtem agientsü telatetba tan agiba tezüngzüktep nung densema lir.