Alima tashi abenba linük lenirtemi Paris nung tongti senden amen

Paris, June 03 (Agencies): US, Europe aser Arab linük lenirtem densema, alima tashi abenba linük lenirtemi France kübok Paris nung tongti senden ka tanü, Hokolbar nü menogo.

Israel aser Palestine na tsüngda yimjung nung alitsü senden tanaben menshitsü ajungshitsü aser par linük ana tsüngda yimjung tezüngzüktep agiba ajanga Mideast nung tensa tajungba kümdaktsütsü nükjidong nung alima lenirtemi tan sendenji amen.

“Israel aser Palestine nati yimjung nung alitsü lemtettsü ajungshir. Ano, par linük ana tsüngda yimjung nung alitsü jembitepdang par linük ana tentetdak, Mideast ajunga nung tensa jungdaktsütsü onüka benoka jembitsü nungdaker,” ta tanü senden lapoktsüdang France Tir, Francois Hollande-i metetdaktsü.

“Tan ayongba yimjung mapatong takok ngudaktsütsü asoshi alima tashi abenba lenirtemi tongti shilem agitsü ajungshir. Ajisüaka, par linük ana tsüngda yimjung tezüngzüktep agitsüjibo Israel aser Palestine na dak keta lir,” ta pai ashi.

“Tan senden nung shilem agirtemi tongtipangsüa benoka jembitsü asoshi onük renema mali. Ano, Israel aser Palestine na tsüngda yimjung lidaktsütsü mapatong nung ozü US-i kechi shilem agitsü tang tashi mejangjateti lir,” ta tanü senden nung US tenüng nung shilem agisang, US Secretary of State, John Kerry-ia metetdaktsü.

Tawa Israel aser Palestine na tsüngda rarabaren taoba mapang nungi tesashiba atalokba den külemi, tan Paris nung amenba senden nung shilem agitsü asoshi Israel aser Palestine na mejaoki lir.

Ajisüaka, Avigdor Lieberman-i Israel Defense Minister tasenba inyaktsü tenangzükba tan Hombar nü agiba ajanga Israel aser Palestine na tsüngda tesendaktep tajungba akümtsü ta alimai imlatsü tenzükogo.

Ano külen, Israel aser Palestine na densema, alima jenjang nung senden ka taküm 2016 kümsa ayonga amentsü sentong renemba osang ka UN Secretary General, Ban Ki-moon-ia tanü senden nung metetdaktsüogo.