Alima tatsükba akümbaren azüoktsü agiba telemtetbaren sangoktsür

(Abelen nungi achijileni tarensena) France Ecology Minister, Segolene Royal; France Tir, Francois Hollande; France Foreign Minister, Laurent Fabius aser United Nations Secretary General, Ban Ki-moon nungeri Paris nung agiba United Nations Clima Change Conference (COP21) nung shilem agirtemi agiba alima tatsükba akümbaren azüoktsü telemtetba pela agizükba noksa nung angur. (Paris, December 12)

Paris, December 12 (Agencies): Alima lenirtemi hopta ana shia agia Paris yimti nung Climate Change mungdang amenba sülen alima tali tatsükba akümbaren azüoktsü asoshi agiba telemtetbaren tanü Honibar nü alima dang sangoktsüogo.
Tanü zünga metetdaktsüba telemtetbarenji tan mungdang nung shilem agir linük 190 nungi lenirtemi agizükba sülen kasaji mapa küma inyaktsü alizüng yua lir.
“Tan otsüsütsüsa telemtetba balala agiogo. Tan telemtetba tajung agiba ajanga alima Celsius degree 2 mesüra degree 1.5 dak tema tatsükba mekümdaktsütsü alizüng asangsang nung ajangzüktsü imlar,” ta France Foreign Minister, Laurent Fabius-i tanü metetdaktsü.
“Tan alima tali tatsükba mekümdaktsütsü asoshi agiba telemtetbaren ya küm 5 shia tanaben reprangshitsü renemogo,” ta ashiba den külemi, iba alizüng asangsang nung ajangzüktsü nükjidong nung tang arentsü tenzükba linüktem nem kümshi dollar sen billion 100 agüja parnok yaritsü renemba osang ka pai sangoktsü.
“Asen alima tia tajungba kümdaktsütsü teimala ajunga tan senden nung shilem agir dak yua lir. Anungji, aseni bendanga agüja inyaktsüla,” ta United Nations Secretary General, Ban Ki-moon-ia tanü ayongzük.
“Alima ajungai ka küma külemi lungjemer inyakba ajanga linük shiai tajangzük angutsü ta lenir ajungai tangatetba tajung ayutsü ajungshir,” ta pai shisem.
France Tir, Francois Hollande-ia tan agiba telemtetbaren agizüka alima tia tajungba kümdaktsütsü asoshi tan senden nung shilem agirtem ayonga liasü.
Tan agiba telemtetbarenji agizüka mapa küma inyakba ajanga alima tali tatsükba kümdaktsüba ali telungi nungi tutetba totzü aser iba amala osettsüset amshibaren kanga ajema kümdakja alimai küm 20 tejaklen ayuba alizüng asangsang nung ataloktsür akümtsü.