Alima tetsü oshi anogo

Tanü Tsüklai (February) 21 anogo ya alima ajunga nung Tetsü Oshi Anogomong amonger. Alima nung nisungtemi jembiba oshi ya ajak agi meyirijang trok ser noklang pongo shi lir aser item oshitem rongnung kin tilatem oshi aika yakta samatsüba tia nung lir. Koba kin südir süaka, pei tetsü oshi ya o dang masü saka kin ka tenüng aser ayak lir, anungji pei tetsü oshi temeja ka melira, nisungbo nisung saka pei tenüng maka amai asütsü. Iba nüngdakji angateta United Nations Educational, Scientific and Cultural Organisation (UNESCO)-i anir alima ajunga nung 2000 küm nungi tenzüka küm shia February (Tsüklai) 21 nü Alima Tetsü Oshi Anogo amonger. Atangji, Tsüklai 21 nü alima ajunga nung Tetsü Oshi Anogomong amongtsüsa akümba ya Bangladesh nung Bengali nungertemi 1952 küm par tetsü oshi kümzüktsü asoshi taküm dena bendanga agüja inyakba ajanga lir. 1947 küm kodang British yimten kübok lia aliba India lima nung tamangba yimsü nung amendaker, Hindu nunger teimba aliba lima ka, aji India aser Muslim nunger teimba aliba lima ka, aji Pakistan, ta alima yimten ka agi ana küma lemdanger yimten nüjiso agütsü, Pakistan-bo alima ana amato liasü, ka West Pakistan, aji tang aliba Pakistan aser kaji East Pakistan, aji tang aliba Bangladesh. West aser East Pakistan lushi na tsüngda India aliba dang masü saka tenaji sobaliba aser oshi nunga kenyongi balala liasü, anungji tamangba yimsü kasa süaka yimten ka kübok kin ka ta ser alitsübo kanga tasak aser timtem tulu liasü. Iba ama tensa mapang ka nung, 1948 küm Pakistan government-i Pakistan lima nung tetsü oshiji Urdu asütsü ta yimten telemtetba ka sangdong. Iba sangdong jagi East Pakistan (tangbo Bangladesh) nung Bengali mesüra Bangla oshi jembirtem kanga jashidaktsü aser parnoki iba sangdongji magizükteti anema apusotsü tenzük. Iba kasa 1948 küm Tsüklai (February) 23 nü Pakistan tatar senden nung East Pakistan nungi Bengali nunger yimsüsür ka tenüng agi Dhirendranath Datta-i Pakistan lima nungbo tetsü oshi ya ka dang masü saka Urdu aser Bangla na prongla asütsü tim ta Bangla oshi jembirtem tenüng nung ken o benoka jembi saka magizük. Joko, iba sülenbo East Pakistan nung Dhaka University nung kaketshirtemi anir nübortemi Pakistan government-i Urdu oshi dang tetsü oshi asütsü lemtetba telemtetba anema longkak aittsü tenzük. Ajisüaka, Pakistan governmenti Bengali nungertemi ashibaji bilemdangtsü melen, tekong temerangba aküm aser East Pakistan nung telok kecha senden ayongzüka alitsü memela. Alima nung pei tetsü oshi meimba aser akümtsübua amshiba kinji Bengali mesüra Bangla nungertem ya lir, anungji parnoki Pakistan government ozüngjia mangai, 1952 küm Tsüklai (February) 21 nü Dhaka nung lokti senden tuluka ayongzük. Iba anogo nung Pakistan sepaitemi longkak aita lokti senden lia alidakji injang yok tenzük. Iba lendong nung nisung pongo Salam, Barkat, Rafig Jabbar aser Shafiue kaset aser noklang aika yiru. Alima nung pei tetsü oshi mesamadaktsüi kümzüka amshitsü asoshi taküm ajak bendanga agüja tongpang nokdakba otsübo iba ya dang asütsü. Item asür pongo tenüng nung Dhaka nung nüngshi tesem ka yanglua lir. Iba tesem dang Shaheed Minar ta ajar. Tanü alima tetsütem anogomong amongba anogo ya Bangladesh nungbo sodi anogo lir aser iba anogomong nung nübortemi Shaheed Minar semdanga pei tetsü oshi atema pei taküm tenla agütsür nem akümtsübu agütsür. Iba tatalokba anogo ya alima nung tetsü oshi ajak asoshi tongtibang ka küma 2000 küm nungi alima ajunga nung Tsüklai 21 nü Tetsü Oshi Anogomong ya amonger. Iba anogomong tenüng nung sentong tapu balala agia tetsü oshi wazüka amshitsü aser renlokdaktsütsü atema bilemdangtsü asoshi küm shia United Nations-i omen kaka shimtetter aser taküm 2020 küm omenji ” Tetsü Oshi ya Terenlok, Yimjung Yangluba aser Putepshidaktsütsü atema tongtipang,” ta shimteta lir. Atangji, asenoki aginüaka, terenlok, yimjung aser putepa alitsü atema asenok rongnung pei oshi agi mejembitet tashi, kati ka dak temulungdoka melitettsü. Yimten nunga jenjang temaba nung alirtemi inyakbatem teküpbok jenjang nung alirtemi metettsü tasak asütsü aser azüklen alirtemi alilen alir tia jenjang memetettsü, anungji merenloktsü aser yimjung nung putepa melitettsü. Aji oda, taküm 2020 küm Alima Tetsü Oshi anogomong omen yagi asenok shisatenük tuluka lapoktsüogo.