Alima tetsürtem anogo

Tanü March 8 ya alima ajunga nung tetsürtem anogo amonger. Atangji, tetsürtem ya maparen aika nung teburtemi mezüngmeshia amshir. Ano, alima kin kar nungbo teburtem dang nisung amato bilemer, anungji tetsürbo nisung amato mezüngshir. Aji oda, mapabo ajak tetsürtemi inyaktsüla saka tagitsübo ajak teburtem meyong akümtsüla ta asüba sobaliba agi tetsürtem nisung jenjang nung mezüngshiba kin aika lir. Teburtembo pei kinüngtsü aika ayutsü akok saka tetsürtembo pei kinüngbo ka den aliba dak alaka tangar den medemra long agi onseta endoktsü mesüra lokti nungi jendoktsü ta asüba ozüng kübok aliba alima kin aika lir. Asenok sobaliba nunga tetsürtembo alima meimchirtem rongnung tanabuba jenjang nungang züngshir. Tetsürtembo yimten nung shilem magidaktsür, lokti nung mejembidaktsür aser yimkong asoshi telemtetba agidak medendaktsür. Aji oda, asenok sobaliba nung tetsür o tanur na ya kasasa jenjang nung amshir, iba jagi aiben “nenok tetsür tanur ola tadok,” ” tetsür tanur o magir,” ta jembir. Item kulitem jagi teburtemi yimten aser lokti nung tetsürtem koba ama jenjang ka nung amshiar metetter. Item ama teburi tetsür mezüngshiba mapatem agi tetsürtem mulung kanga yirua alitsü. Iba ama tetsürbo nisunga masü ama amshiba jenjang nungi nüshiso jenjang ka ngutettsüji tetsürtem ajak asoshi teinyaktsü kanga tongtibang akümer. Ibayongji, tanü lima nung tetsür o tebur na kasa ta jembir aser yimten aser arogo nunga tetsürtemi teburtem den kasasa shilem agitsü meranger. Iba jagi yimten nunga tetsürtem asoshi menden balala shiteta meyutsüyonga tetsürtemi temaba menden ajangzükteter. Item ajakji tetsürtemi teburtem den toktepa meranga inyakba aküm aser takok mapatem asütsü. Tanü asen lima nung tetsürtem temeten indang jembidang, yimten nung tetsürtema shilem agitsü asoshi tetsürtem nem menden balaka shiteta yutsütsü indang jembir. Atangji, tang tashibo asen lima nung tetsürtem jenjang ajemreptsüa alinungji, tetsürtemi yimten nung shilem magitetter. Iba jagi balaka yimten nung tetsürtem asoshi menden balala shiteta yutsütsüba indang jembir. Ajisüaka, yimten nung tetsürtem asoshi menden kija shiteta yutsüba agi majungtsü. Menden balaka shiteta yutsüyonga, lai alima aser nübortem memeimra koda ? Menden shiteta yutsüba nung amenyonga la dak temetetba melira koda ? Menden balaka shiteta yutsüba nung amenyonga tatar senden nung aser medemer tsüngdang pei bilemba tebang agi meshitetra koda ? ta asüba tasüngdangbatem aika langzütsüla adoker. Aji oda, teburtemi tetsürtem jenjang aika nung ajemrepja liaka, tetsürtemi teburtem den kasasa akümtsü memerangi tetsürtema tetsürtem ama jenjang tajungba nung alitsü merangtsüla. Kodang tetsür o tebur na kasasa alitsü ta asüba tangatetba nung toktepdir, iba jagi kibong aser lokti mesüngjemtettsü. Ajisüaka, tetsürtemi tetsür tajung kaka akümtsü merangra, kasasa masü saka teburtem dang nungi tajungba kümer alitsü. Tanü alima nung iba ama takok tulu anguba tetsürtem  aika angutsü. Tanübo tetsür tebur kecha balaka mali ajak kasasa nisung dang ta asüba tangatetba kati aruogo. Tetsürtem anogo ya tetsütem anogo amai dang lir, anungji asenok ajaki ojala, otsüla,oyala aser amola nunger ajak nem tenüngsang agütsütsü tim. Taküm 2016 küm alima tetsürtem anogo amongba  omenji “Planet 50-50 by 2030: Step It Up for Gender Equality”, ta agüja lir. Tetezü 2030 küm tashi nungbo tetsür o tebur na kasasa kümer alitsü ta asüba temulungtetba aser nükjidong lir. Tetsürtem tebilembaji kechiar mejangja, saka teburtem den kasasa asütsü memerangi tajungba asütsü merangtsüla. Asen lima nungbo tetsürtem asoshi kecha tenokdangba mali, iba maongka aser temetenji nisung ajaki kanga akümtsübua amshitsüla. Aji oda, tetsürtem anogo ya  teburtem den temeten toktepba anogo ka amai masü saka tetsürtem dak aketba tashi, tekolok aser shisatsü indang jembia, alima nung tetsürtem keshisarina metetba aser angazüka amshiba nung tashi itshiba anogo ka südaktsütsüla.