Alima wazüka ayutsüji nisung ajak khuret: Angh

Guwahati, June 04 (Agencies): World Environment Day anogomung nung Assam aser Nagaland Angh, P B Acharya-i nüburtem dang alima wazüka ayutsü indang rajema alitsü osang metetdaktsü.
Iba anogomung osang nung Angh-i, “Alimai wazüka ayuba indang rajema alitsü, lipoküm atema inyaktsü aser alima wazüka ayutsü indang rajema lidaktsütsü asoshi kümshia June 5 nü World Environment Day amunger,” ta ashi.
Iba ya United Nations Environment Programme (UNEP)-i ayonga amunger.
Acharya-isa, “World Environment Day dang ya Environment Day, Eco Day mesüra tatsüba agi WED ta-a ajar. Küm shia tongtibang amungtsümung rongnung iba ya ka lir aser alima tesem ajaklen nisungtemi taküm indaktsüba lima kümzüka ayutsü nükjidong nung amunger,” ta ashi.
“Meimchirtem taküm nung süngdonglidong tajung den anema alitsüji tongtibang ta sangdongtsü aser alima wazüka ayutsü atema mera balala agitsü nükjidong nung 1973 küm nungi tenzüka kümshia iba anogo amunger,” ta paisa ashi.
“Alima nüburtem dang pei aliba lima kümzüka ayutsüji sorkar mesüra iba atema inyaker lokti tentet kar mapa dang masü saka ajak khuret lir ta rajemdaktsütsü atema iba anogomung amunger,” ta paisa shisem.
Pei aliba lima kümzüka ayutsüji tongtibang ta shia Angh-i, tekümdang nisungtemi pei aliba tesem anepaluba den külemi meimchirtem nüngdak peritsü atema ali nungi adokba rongsentem nüngdaka reprangtettsü, ta ashi.
“Meimchirtemi chiyungtsü aser tzü nüngdaker. Asenoki energy-a nüngdaker. Ajisüaka asenoki shiruru aser süngdonglidong kümzüka ayutsü atema-a parnok nüngdakbatem wazüka yutsütsüla,” ta Acharya-isa shisem.