Alima ya asenoki bilemba ama kanga tsübutsüsabo masü

New York, April 22 (Agencies) : Alima tzü mopung melenshiba aser lokti liba ajungtsü atema kanga nendaka bilemsang, John D. Sutter ya CNN nung yimozulür ka lir. Pai Snapchat, Facebook aser email ajanga alima atema metetdaktsüba kar Earth Day nüngtem nung lemsateper.
Tarutsü atema alima ya kanga tetsübutsüka amai asenoki bilemer aser temelenshi aika adokba ajanga asenok tsübuteper. Alima nung rüh long tulu ajak yimsaa aoer, tatsük tali akümer, arem min tulu mali akümer, shidi sümadar aser China nung aliba tanurtemi anüngji ‘blue’ sentsüa ta memetet. Ya tebilemtsü tulu lir.
Aji oda süaka asenoki bilemba ama asenok kangbo sensentsü mali kechiba süra December 2015 nung linük 195-i alima tzü mopung menena akümba nokdangtsü atema tenangzüktepba ka agitsü lemtetogo.
Asenok temulung ila mebilemtsü atema temetettsü pongu lemsateper:-
1. Paris kiralongrartemi amakba mapang December 2015 nung COP21 U.N. climate change summit amen dang linük 195-i Paris Agreement renema ayu. Iba dak ajemdaker item linüktem yagi alima tatsük ‘2 degrees Celsius’ agi ajema kümdaktsütsü renem.
2. Anü tashi sen kanga dalang kümogo. Totzü atsüktsü melena mopung aser anü tashitem ajanga tapu ajak amshitsü asoshi oset aika yangluteta lir aser item oset ya jenjang kanga tasak masü.
3. Ali telung nungi nagmati aser totzü agitettsü atema sen intokba dang nungi anasü agi tali tzü mopung memenendaktsüba tashi bushitsü atema alimai 2015 küm inyakyim tenzükogo.
4. Electric garitem kanga nüngtugu kümdar. Gas aser diesel atsüba garitem ajanga mopung kanga menentsür. Anungji item gari melena electric gari amshiba ajanga mokozü kanga ajema kümdaktsütsü aser ano tajung kaji tanü asüngbo electric tashi-a kanga temerük lir.
5. China nunga tzü mopung memenentsü atema inyakyim tenzükogo. Parnoki sangküm nungi tenzüka carbon tali adokba nokdangtsü atema sentong lir. Alima nung tzü mopung menentsür linük tulutibaji China lir, ajisüaka ano mopung temerük jenti ngutetba tesem jia China-sa lir.