Alima yimjung atema linüktemi ‘union’ ka tentettsüla: Dalai Lama

Hyderabad, February 12, 2017 : Deobarnü Hyderabad, Hictec City nung Tibet nunger tamang yimsü lenir, Dalai Lama-i Dalai Lama Centre for Ethics & Transformative Values yanglutsü atema lung azüngtsüba noksa nung angur. 

Hyderabad, February 12 (Agencies): Deobarnü Hyderabad nung Tibet nunger tamangba yimsü lenir, Dalai Lama-i, alima linük ajaki European Union (EU) telongjem tanela agia ‘union’ ka tentettsüla, aser mitkar tashi makai kümdaktsütsüla, ta ashi.
Dalai Lama-isa, US Tir, Donald Trump-i jara yangluba ama masü, saka tebilemtsü onük balala latettsü atema ken o jembitsüla aser ajak yimjung nung alitsü atema ‘Union’ ka tentettsüla, ta ashi.
Paisa, “European Union nükshir rongnung ni ka lir. EU tanela amaji African Union-a tentettsüla ta ni aiben jembia arur. Ano Latin America nunga Union ka tentettsüla. Ano khenkhenbo ni yamai bilemer, America nung Tir tasenba (Donald Trump)-i jara ka yangluogo, aser Mexico jia United States shilem ka asütsüla,” ta metetdaktsü.
Tanü Hyderabad nung ‘Ethics, Values & Wellbeing’ onük nung jembidang Dalai Lama-i, “Latin America nung Union ka, iba sülen Asia nung. Asia nung linük tulu ana- China aser India, iba sülen Japan, Bangladesh-i Union tentettsü akok. Iba sülenbo alima linüktem union ka tenteta alima nung mitkar tashi agientsütsüla,” ta lenirisa metetdaktsü.
21buba puto ya ken o jembiba puto ka asütsüla ta shia pai, “Alima nung mitkar tashi agientsü atema asenoki ken o jembitsü merangtsüla. Tasa tajungtibaji ken o jembiba lir, kodang mangatettep ken o aser onüktem adokdir, ken o jembiba ajanga ibaji latettsü akok,” ta ashi.
Paisa, India ya alima linüktem atema tatishitsü tajung ka lir, iba linük nung tamangba yimsü temeyoktep aika akhümtsübutepa alir, ajisüaka khenkhenbo timtem adoker, aser ibajibo angateter, ta ashi.
Dalai Lama Centre for Ethics & Transformative Values nung Andhra Pradesh aser Telangana Angh, ESL Narasimhan, Telangana Deputy Chief Minister Mohammad Mahmood Ali, state IT Minister KT Rama Rao aser tongtibang nisungtemia shilem agia liasü.