Alimai AKP teloki Turkey election akokbaren agizüktsüla: Erdogan

Istanbul, November 02 (Agencies): Alimai Turkey madak yimsüsütsü tashi benokba Justice & Development Party (AKP) yimtenren teloki tan agiba Turkey parliamentary election nung takok anguba osang agizüktsü olen ka Turekey Tir, Recep Tayyip Erdogan-i tanü Hombar nü metetdaktsüogo.

Taküm June ita agiba election nung tamakok angubaren melenshija, Erdogan-i aniba AKP teloki tan election nung bendenba vote noklang shilem nung shilem 49 tashi ngua maneni par linük madak yimsü asütsü tashi yashi Deobar nü ngua lir.

“Ozü APK teloki tan election nung takok anguba ya alimai agizüktsüla. Ajisüaka, alimai iba tangatetbaji tanü tashi mesayui lir,” ta Erdogan-i tanü ashi.

Taküm June ita agiba election sülen Turkey Ato Kilonser, Ahmet Davutoglu-i opposition telok 3 den külemi lungjemer teloktep sorkar metentetba yong Erdogan-i par linük nung parliamentary election tanaben agishitsü ayonga tan election sentongji agia liasü.

Tongti opposition telok, Republican People’s Party (CHP)-ia tan election nung vote noklang shilem nung shilem 25 shi anguba osang jangjaogo.

Ano külen, Davutoglu-ia Turkey linük temzüng tanaben reprangshia nungdakba temelenshi agitsü olen ka tanü sangoktsüogo.

AKP teloki tan election nung takok ngua par telok kija sorkar tasen tentettsü jenjang tajung nguaka, par telok kijai linük temzüng melenshitsü maparenbo mapa küma inyaktettsüsa tashi monguteti lir.