Alimai aroki lungjemer refugee khuret abentsü ajungshir: Erdogan

Ankara, May 24 (Agencies): Alimai tang ajurushia aliba refugee aser migrant nisungtem den sentakba khuret aroki lungjemer abentsü tajungshiba olen ka Turkey Tir, Recep Tayyip Erdogan-i yashi, Hombar nü metetdaktsüogo.

United Nations (UN)-i ayonger külen yashi nungi tenzüka Turkey kübok Istanbul yimti nung anogo ana asoshi amenba World Humanitarian Summit senden nung o jembidang Erdogan-i iba tajungshiba olenji sangoktsü.

Alimai tesüiba mapang, World War II sülen tan mezüngsüa refugee nisungtem den sentakba khuret tulutiba  ajurutsü tenzüka lir aser Turkey sorkari par linük jenoka alir refugee nisung million 3 dak tema mesüa, refugee khuret tulu benoka aliba osang bushiteta lir.

Alima ajunga nung mozü teyari agütsür, Doctors Without Borders (DWB) tentet densema, tentet balalai tan senden amenba ajanga tajangzük aser temelenshi tajung bener marutsütsü akok ta metetdaktsüogo.

Ajisüaka, alima linük 60 dak tema nungi lenirtemi tan senden amenba ajanga refugee aser migrant nisungtem den sentakba khuret bentettsü lenmang aser tasa bushitettsü alizüng yua lir.

Ano külen, Turkey-i refugee nisungtem indang temeten anema inyakba bushisüngdangtsü tajungshiba olen ka Amnesty International den pusema, UN Human Rights lenisang, Zeid Ra’ad Al Hussein-i tawa benokogo.

Ajisüaka, par sorkari refugee nisungtem indang temeten anema inyaker masü saka Kurd kini tentetba telungpur aser Islamic State (IS) kiralongrar teloki par linük lendongtsüdong kanga sashia atalokdaktsüba ajanga ozüng tesashi latettsüsa akümba osang ka Erdogan-i par sorkar indang inyakyim metenja metetdaktsüogo.