Alimai asür Muhammad Ali tatembangsüa tushiogo

Louisville, June 10 (Agencies): Alima lenirtem, nungtugu nisungtem aser tsüngteper o temeimertemi tsüngteper mongin, asür Muhammad Ali tatembangsüa tanü, Hokolbar nü tushia pa nem aküm agütsüogo.
Mangyimertemi Ali alidak, Kentucky state kübok Lousville nung tentetba West End kiyong nungi Cave Hill National Cemetery tonga Ali tasümang bener aodang lenmang tezülen nokdaker pa nem aküm agüja liasü.
Tesüiba mapang heavyweight boxing champion 3 ben tashi abensang, Ali arishi küm 74 lia Parkinson’s tashidak agi shiranga taoba hopta asü.
KFC Yum Center nung agiba asüpila sentong nung taoba US Tir, Bill Clinton aser asayamenür, Billy Crystal nati o jembia liasü.
Kasa sentong nung Turkey Tir, Tayyip Erdogan-ia shilem agiba osang jangjaogo.
Ali mang ayuba süngden abener rong nung Hollywood actor, Will Smith aser taoba heavyweight champion, Lennox Lewis na densemba osanga angazükogo.
Asür Ali taküm otsü nung ajemdaker 2001 küm yangluba ‘Ali’ film nung shilem agiba nüngtem nung Oscar sempet agütsütsü asoshi Smith tenünga benoka liasü.
Tanü tatembangsüa asüpila sentong agiba jakdang Islam tamangba yimsü benshia, Ali den asüpila sentong ka yashi, Brehostibar nüa agi aser iba sentong nung o jembirtemi Ali-i taküm alidang, 1960s mapang America nunger tanak nisungtem indang temeten atema nokdakba indang shia pa dang ‘The people’s champ’ ta tenüng jaloktsü.