Alimai Blasphemy ozüng ajunga agientsüla: UN

Geneva, March 11 (Agencies): Alima nung tentetba linük ajungai Tsüngrem, tamangba yimsü mesüra langa temeshi ta züngshiba anema jembir mesüra inyaker nem tasüba temerenshi agütsütsü asoshi latetba blasphemy ozüng agientsü takhangba olen ka United Nations Special Rapporteur on Freedom of Religion or Belief, Heiner Bielefeldt-i metetdaktsüogo.

Bielefeldt-i Switzerland kübok Geneva nung amenba UN Human Rights Council senden nung alimai blasphemy ozüng benokba osang benoka, iba ozüng agientsü takhangba olenji metetdakja liasü.

“Blashphemy ozüng benokba ajanga nüburtem nem agütsüba tetsükdakba kecha meli pei amangnüba tamangba yimsü amangtsü aser pei tebilemba lemsateptsü temeten amokbanga ayur aser kasaji benokba ajanga nübur o nübur na tsüngda tsükchitepa adoker. Anungji, alima ajungai blasphemy ozüng agientsüla,” ta pai ashi.

Alima linüktem rong nung Pakistan linüki blasphemy ozüng kanga sashia benokba osang bushiteta lir.

Iba ozüng nung aitsüba sülen par linüki nisung aika nem tasüba temerenshi agütsütsü obendang agüja lir saka tanü tashi nung aibelener nisung ka danga tepseta merenshiba osang bushiteta mali.

“Islam tamangba yimsü mebenshir – Shi’ite, Christan aser Ahmadi nisungtemi Pakistan nung tamangba yimsü nung ajemdaker tebang agi mejembitetba timtem toushi ajuruba osang bushiteta lir,” ta Bielefeldt-i metetdaktsü.

Ano, Middle East, Southeast Asia, Central Asia aser Europe nunger nunga blasphemy ozüng benoka aliba linük aika aliba osang bushitetogo ta pai shisem.