Alimai Greece-i ajurushiba migrant khuret benzüktsü ajungshir: Ban

Greece kübok Athens nung osangbener den aroki ajurutepba jakdang Greece Ato Kilonser, Alexis Tsipras (Achijilen)-i UN lensiang, Ban Ki-moon nem life jacket ka amoktsüba noksa ka yangi angur. (Athens, June 18)

Athens, June 18 (Agencies): Alimai Greece linüki tang ajurushia aliba migrant nisungtem den sentakba khuret benzüka par linük den yariteptsü tajungshiba olen ka United Nations (UN) Secretary General, Ban Ki-moon-i tanü, Honibar nü metetdaktsüogo.
“Greece linük nung pei talidak toktsür migrant nisung meyirijang jenti jenoka lir. Par linüki rongsenren khuret tulu ajurushiba mapang ka nung tang migrant nisungtem den sentakba khureta benoksema lir. Anungji, alima linüktemi Greece linük den yariteptsü ajungshir,” ta Ban-i ashi.
Europe nung jenoka alitsü meranger migrant nisung million ka shi Europe nung mezüng tetsüng ajemokdak, Greece kübok Lesbos asetkong semdangba jakdang Athens yimti nung osangbener den ajurutepdang Ban-i tanü iba olenji sangoktsü.
“Greece linüki kija nem migrant nisungtem den sentakba khuret ya mebendaktsütsüla,” ta Ban-i Greece Ato Kilonser, Alexis Tsipras den senden ka amenba sülen nenshia ashi.
“Migrant aser refugee nisungtem kümzüka parnok taküm jenjang tajungba kümdaktsütsü asoshi asenok ajaki aroki lungjemer nungdakba maparen inyaktsüla. Aji oda, Europe aser alima ajungai aroki lungjemer migrant nisungtem den sentakba khuret ya abentsü ayongzüker,” ta pai shisem.
Yaküm, 2015 küm kisüng nung migrant nisung million ka dak temai rubber agi yangluba rong tila nung mener Aegean Sea ajangdanga Turkey linük nungi Greece kübok tentetba asetkong balala tonga aoba osang bushiteta lir.
Ano, tzüyim ajangdangdang migrant nisung noklang aika asüba osanga bushitetogo.
Turkey linük European Union (EU) nung züngsemtsü aser par nüburtem nem visa mebendaktsüi Europe ajunga nung tetsükdakba kecha majurui senzütsü melatsü melena, temelaba magi Greece nung jenokba migrant nisungtem Turkey linük nung jenokdaktsütsü tezüngzüktep agiba sülen, taküm March ita nungi tenzüka, migrant nisungtemi Turkey tsütsülen nungi Greece bushia aobaren tang kanga ajema kümogo.
Ano külen, Greece nung jenoka alitsü temelaba agitsü jangrar migrant nisung 8,400 shi tang Greece kübok Lesbos asetkong nung jenoka aliba aser Greece linük nunga migrant nisung 48,000 shi tang jenoka aliba osanga bushiteta lir.
“Turkey aser EU nati agiba tezüngzüktep mapa küma inyaktsü ajungshir,” ta shia, taküm kümzüktsü osettsüset menungdaktsü temaitsü sayua, Tsipras-ia life jacket ka Ban nem tanü amoktsü.