Alimai Hitler, Mussolini, Modi ama lenirtem menüngdaker: Digvijaya

New Delhi, March 16 (Agencies): Tanü Congress lenir tain, Digvijaya Singh-i akhidang kijai tashi amshir Adolf Hitler aser Benito Mussolini na Ato kilonser, Narendra Modi den medemdanga jembi.
Alimai Hitler, Mussolini aser Modi nunger ama lenirtem masü saka Mahatma Gandhi aser Martin Luther King nunger ama lenirtem nüngdaker, ta pai ashi.
Congress Party Tir, Rahul Gandhi-i yashi New Zealand nung nisung kati Muslim nunger tekülem kidang nisung 49 khasetba sülen anogo ka lir tanü Digvijaya Singh-i, alimai temeim, yimjung aser aria bilemba tangatetbatem nüngdaker; Sanatan Dharm, Gautam Budha aser Mahavir nungeri tesempa aser rara masü saka temeim, yimjung aser aria bilemba tangatetbatem ajungkettsü, ta ashi.
Hitler aser Mussolini na den Modi medemdanga taoba mapang Madhya Pradesh Chief Minister aser Congress lenir Singh-i, “Ni Rahul den ai-aura akar. Alimai tesempa aser rara masü saka Sanatan Dharm, Gautam Budhha aser Mahavir nungeri ajungkettsüba- temeim, yimjung aser aria bilemba tangatetbatem nüngdaker. Asenoki Hitler, Mussolini aser Modi nunger ama masü saka Mahatma Gandhi aser Martin Luther King nunger ama lenirtem nüngdaker,” ta ashi.
Yashi Rahul Gandhi-i, alimai tesempa masü saka aria bilemba aser tangatetba tajung nüngdaker, ta jembia liasü.
New Zealand nung kiralongrar kati mosque ana amakba sülen Rahul-i twitter ajanga, “New Zealand nung injang khaloktsübaji kiralongra mapa lir aser aitsütsü tetemsü. Alimai aria bilemba aser tangatetba tajung nüngdaker. Ni asür kibongtem den mangyim lemsateper. Yirua alirtem atema ni sarasademtsür,” ta lemsatep.
Yashi New Zealand kübok Christchurch nung mosque ana nung Muslim nunger Hokolbar sarasadem mapang nung nisung kati Muslim nunger 49 khaseta liasü.