Dubai, January 17 (Agencies): United Nations (UN), United States (US) aser European Union (EU) nunger densemba, alima tashi abenertemi Iran anema benokba tenokdangba sentongtem yashi Honibar nü agienogo.
Iran-i tongpang nung amshitsü nuclear osettsüset yanglua kasaji rizünger ta temulung melemi bilema, alima tashi abenba linüktemi Iran anema tenokdangba sentong balala benoka Iran den tesendaktep küm aika mejungi aruba sülen par linük anema benokba tenokdangbatem agientsü melena Iran-ia par nuclear mapatong anentsü tezüngzüktep ka yaküm, 2015 agi.
Iba tezüngzüktep den sentaktepa, UN kübok tentetba International Atomic Energy Agency (IAEA)-i tendangba sülen Iran-i nangzükba ama inyakba kuli tejangja yashi benokba sülen alima tashi abenertemi Iran anema benokba tenokdangba sentongtemji agiena liasü.
“Alimai tenokdangba sentongtem agienba ya Iran linük otsükaket nung ‘Hon tapak ka’ lir. Asen linük anema benokba tenokdangba sentongtem agienba ajanga asen linüki terenlok angu tenzüktsü,” ta Iran Tir, Hassan Rouhani-ia tanü Deobar nü metetdaktsü.
“Alimaibo asen linük anema benokba tenokdangba sentongtem agienogo. Ajisüaka, Israel densema, US Congress yimsüsür aser Gulf yimli kari tenokdangba sentongtem agientsü maparenji kanga sashia anemogo,” ta pai tanü parliament nung tenokdangba sentongtem agienba osang sangoktsüdang metetdaktsü.
Tan tenokdangba sentongtem agienba ajanga Iran linük indang rongsenren jenjang tajungba akümba den külemi, par linük densemba region nunga tensa tajungba akümtsü imlaba olen ka Rouhani-isa metetdaktsü.
Tan tenokdangba sentongtem den sütepa, Iran-i pua ayur US senso nisung 5 tashi chiokba osang ka sangdongogo.
Tan tenokdangba sentongtem agienba sülen alima tashi abenertemi marakzüdaktsüi nokdanga aliba dollar sen billion aika Iran-i tetsükdakba kecha meli benshitettsü temeten angur lir.
Britain aser France natia tan Iran anema benokba tenokdangba sentongtem agienba maparenji pela agizükba olen ka tanü metetdaktsüogo.
Japan linükia tarutsü anogo ishika tsüngda nung Iran anema benokba tenokdangba sentongtem agientsü renemba osang ka par Foreign Ministry-i tanü metetdaktsü.
Ajisüaka, “Iran nem tongpang nung amshitsü nuclear osettsüset kodanga meyangludaktsütsü,” ta shia, Israel Ato Kilonser, Benjamin Netanyahu-i Iran amokmerenba olen ka tanü sangoktsüogo.
Netanyahu-i aniba Israel linüki Iran den nuclear tezüngzüktep agitsüa memelungi liasü aser tan par linük anema benokba tenokdangba sentongtem agienba maparenjia magizüki lir.
You must be logged in to post a comment Login