Alimai kiralongra atema jembiba olaji China-i angashitsüla: India

New Delhi, January 04 (Agencies): Jaish-e-Mohammed (JeM) tongti, Masood Azhar ji kiralongrar, ta UN-i sangdongtsü atema benokba China-i nokdangba sülen anogo ishika tsüngda Bodhbarnü Ministry of External Affairs-i, kiralongra anema alimai ayimtenbaji China-i angatsüla, ta ashi.
Osangbenertem senden ka nung Minister of State for External Affairs, MJ Akbar-i, India-i China nem alimai jembiba olaji angashidaktsüner aser kiralongraba ajanga lendong bener arutsübaji angatetdaktsüner, ta ashi.
“Kiralongra onük nung India-i jembiba kijaji masü saka alimai jembiba olaji China-i angashitsü onoki imlar. Aser alimai jembibaji angashipet angashir. Yaküm United Nations General Assembly (UNGA) nung asen External Affairs Minister, Sushma Swaraj-i jembiba onükji ni kodanga mamatoktsü. UNGA nung ibaji tongtibang onük ka liasü. Kiralongra ajanga lendong balalaji onük tiyongtsü liasü,” ta paisa ashi.
Masood Azhar onük nung China’er tangatetba dak sentakba nung pai, “Khuret abenba aser linük tain ka ama China-i ibaji angatettsü imlar,” ta ashi.
Minister-isa, “China-a parnok sasep nung kiralongra tebilemtsü lir. China-i ibaji meteta lir. China-i iba atemaji linük tsüngda tezüngzüktep agia inyaker. Iba tebilemtsü angatetdaktsütsü atema China den jembia inyaktettsü ta ni tamang akar,” ta ashi.
“UNSC züngsem 15 nungi züngsem 14-ibo Masood Azhar anema inyakdaktsüner. Ajisaüka kati (China) memelunger. Onoki amanger, takümbo ibaji malitsü,” ta Akbar-i ashi.
Osangbenertem senden nungji Akbar den külem minister, Gen (retd) VK Singh-a densema liasü.
Pakistan tensa dak sentakba nung Akbar-i, iba linük nungji mepetmesü lir, aser ibaji peisasa timtem bener aruba lir, ta aitsü.