Alimai lungjemer kiralongrar anema raratsüla: Aziz

Islamabad, August 31 (Agencies): Alimai külemi lungjemer kiralongrar anema raratsü tajungshiba olen ka Pakistan’er National Security Advisor, Sartaj Aziz-i tanü Hombar nü metetdaktsüogo.

“Alima ajunga nung kiralongrarbaren anogoshi tesashiba akümer aser Pakistan-ia lendong kanga sashia ajurutsü tenzükogo. Anungji, alima ajungai külemi lungjemer tasa tajung renema kiralongrar madak takok ngua raratsü nungdaka kümogo,” ta pai ashi.

Aziz-i par Pakistan semdangsang, Germany Foreign Minister, Frank Walter Steinmeier den tanü ajurutepdang iba olenji metetdaktsü.

“Ozü mitkari kiralongrar anema tenzükba Zarb-e-Azb mapatong takok tulu ngua agiogo,” ta ashiba den külemi, par Pakistan-i kiralongrartem meshimeshia samatsü temulungtetba ayuba olen ka Aziz-i shisem.