Alimai refugee khuret bentettsü ajungshir: Power

Washington, June 30 (Agencies): Alima ajungai aroki lungjemer tang ajurushia aliba refugee aser migrant nisungtem den sentakba khuret bentettsü atema nungdakba maparen taoba mapang nungi tesashiba inyaktsü tayongzükba olen ka United Nations (UN)-i yokba US Ambassador, Samantha Power-i tanü, Brehostibar nü metetdaktsüogo.
US-ia refugee nisung 30,000 shi 2017 tashi nung par linük jenokdakja par taküm jenjang tajungba kümdaktsütsü alizüng ayuba olen ka Power-i lemsatepa liasü.
“Lendongtsüdong ajurushia alir nüburtem nem teyari sen timba agütsür linük US lir,” ta shia, lar US-i Syria tongpang raraba ajanga timtem toushi ajururtem atema dollar sen billion 5.1 dak tema agüja yariba osang ka Power-i metetdaktsü.
“Alima linük shiai pei akokba teyari agüja refugee nisungtem yaria aruogo. Ajisüaka, refugee nisungtem taküm jenjang tajungba kümdaktsütsü asoshi alimai maneni temulungtetba tulu yur teyari agütsütsü ajungshir,” lai ashi.
UN-i tajemba agi refugee tila tanur million 1 shi school züngdaktsütsü aser million ka shi refugee nisungtem nem mapa inyaktsü lenmang lapoktsütsü alizüng ayuba osang ka Power-sia metetdaktsü.

You must be logged in to post a comment Login