Alimai refugee nisungtem mesendoktsüla: Pope Francis

Vatican City kübok St. Peter’s Square nung Palm Sunday Mass sentong tembangba sülen alima ajunga nung Roman Catholic tamangba yimsü lenisang, Pope Francis-i pope-mobile nung tila tanurtem anioksemer yimdongsüa jajaba noksa nung angur. (Vatican City, March 20)

Vatican City, March 20 (Agencies): Alima, talisa Europe-i pei talidak toksür refugee nisungtem mesendoktsü tajungshiba olen ka alima ajunga nung Roman Catholic tamangba yimsü lenisang, Pope Francis-i tanü, Deobar nü metetdaktsüogo.
Alima ajunga nung Roman Catholic tamangba yimsü benshir nisung billion 1.2 shi ania, Easter tamangba benjung amongba hopta ka jakdang agiba Palm Sunday sentong agidang Francis-i iba tajungshiba olenji sangoktsü.
Yisu Khrista taküm alidang Jerusalem yimti telungi takok tulu ngua aiba bilemteta agiba sentong nung shilem agir nisung meyirijang jenti maoja, Francis-i refugee nisungtem sentokterema aija liasü.
“Ni pei talidak toktsür bendanglen jenoka alitsü meranger aser bendanglen jenoka alir refugee nisungtem meima bilemer. Parnok taküm tia tajungba kümdaktsütsü asoshi alimai nungdakba maparen inyaktsüla,” ta Francis-i ashi.
2015 küm nungi tenzüka pei talidak toktsür refugee nisung million 1.1 dak temi Europe nung jenoktsü tenzüka lir.
Taoba hopta kisüng nunga Macedonia sorkari par linük tonga arur refugee nisung 1,500 shi Greece-i meyipa yokba osang jangjaogo.