Alimai Trump dak temulung alemtsü ajungshir: Sisi

Cairo, November 19 (Agencies): Egypt Tir, Abdel-Fatteh el-Sisi tawa US Tir election nung takok angusang, Donald Trump nem tenüngsang agüja, alimai pa dak temulung alemtsü tajungshiba olen ka tanü, Honibar nü sangoktsüogo.
“Trump-i par lenisütsü tashi abenba jakdang pa dak temulung malemtsü metenzüktsüla kechiyong pai election nübutyimtsü mapang alimai magizüktettsüsa o jembiba aser Tir menden benokba sülen asangsang nung inyakbaji balala asütsü akok,” ta Sisi-i Portugal nung tentetba LUSA osangbener telok den senden ka amendang ashi.
Taoba mapang mitkar lenisang inyakba sülen Egypt Tir akümsang, Sisi-i tan November ita 21 nü Portugal semdangtsü sentong lir aser iba jakdang pai LUSA osangbener telok den ajurtepa, “Trump lenisüba kübok US-i Middle East nung taoba mapang ama meinyaktsü akok ta mapang ano jungi tebilemtsü khuret mebenoktsüla,” ta metetdaktsü.
Republican yimtenren telok nungi Tir candidate, Trump-i US Tir election akokba sülen pa den tepela osang lemsateper alima lenirtem rong nung Sisi ya mezüngpur rong nung densema liasü.
“Alimai election nübuyimtsü mapang o jembiba aser yimsüsütsü tashi benokba sülen asangsang nung mapatong balala inyakba bendangtettsüla kechiyong election mapang jembiba aser asangsang nung inyakbaji aiben balala alir,” ta Sisi-i nenshia ashi.
Muslim nisungtem US linüki maitdaktsüi nokdangtsü densema, Trump-i par election nübuyimtsü sentong nung jembiba o-tem asangsang nungbo balaka asütsü akok ta aikati bilemtsü tenzüka lir aser iba tangatetba nung Sisi-ia tan iba olenji sangoktsür lir.
Egypt nung democracy yimsüsütsü yimya amshia shimba mezüngbuba Tir, Islamist lenir, Mohammed Morsi tashiyim agi Tir menden nungi atsüngdokba sülen 2014 küm agiba Tir election nung takok ngua, Egypt Tir menden abensang, Sisi ya Islamic telungpur aser kiralongrar anema kanga sashia nokdaker lenir ka lir aser Trump-ia Islamic State (IS) telok anema kanga sashia raratsü nangzüka lir.
Tang US Tir menden abensang, Barack Obama aser Sisi na tsüngda tesendaktep kanga jungabo mali saka Obama-i taruba 2017 küm Tir menden toktsüba sülen Sisi aser Trump na tsüngda tesendaktep junga lia, par linük anati tanaben sentaktepshitsü akok.