All England Championships: Sindhu, Srikanth-i anir asayatsü

Birmingham, Metsüremi 13 (Agencies): Rasemnü nungi tenzüktsü aliba All England Championships nung PV Sindhu aser Kidambi Srikanth nati anir India nunger tem asayatsü.
All England Championship akoktsüba ya badminton asayartem atema tetushi rongnung tematiba ta züngshir aser India nunger rongnungi Prakash Padukone (1980) aser Gopichand (2001) nati dang iba asayamung ya kokteta lir.
Sindhu aser Srikanth atema mezüngbuba round kangabo tasak masütsü imlar, saka Saina Nehwal atema kanga melarabo masütsü, kechiyong la Chinese Taipei tsür world no 1 aser defending champion Tai Tzu Ying den mezüngbuba round asayatsü lemzüka lir.
Tang tashi nung Tai Tzu-i, Saina 9 ben koka lir aser Saina-i la ponguben koka lir. Taoba asaya tenet atonga Saina-i la mekoki lir aser iba nung taküm küm tetenzüklen asayaba Indonesia Masters final densema lir.
Sindhu mezüngbuba round nung Thailand tsür Pornpawee Chochuwong den asayatsü, saka la tanabuba round nung India Open nung la tsükdaktsüla Beiwen Zhang den asayatsü akok.
Kasa mapang nung Srikanth France nunger Brice Leverdez den mezüngbuba round asayatsü shiba pai mela mela akoktsü imlar.
Maneni India nunger asayartem rongnungi Singapore Open champion Sai Praneeth aser world no 12 H S Prannoy nata densema lir.
Praneeth, Korea nunger Son Wan Ho den asayatsü aser Prannoy, Chinese Taipei nung asayar Chou Tien Chen den mezüngbuba round asayatsü.
Tarep asaya nung Indonesia Open semi-finalists Chirag Shetty aser Satwiksairaj Rankireddy na Japan nunger Takuro Hoki aser Yugo Kobayashi na den asayatsü.
Manu Attri aser B Sumeeth Reddy na Marcus Ellis aser Chris Langridge na den mezüngbuba round nung asayatsü aser tetsür tarep asaya nung Ashwini Ponnappa o N Sikki Reddy na Japan tsür Misaki Matsumo aser Ayaka Takahashi na den asayatsü.
Tarep temeyoktep asayar Pranaav Jerry Chopra aser Sikki na Germany nunger tarep Marvin Emil Seidel aser Linda Efler den asayatsü.
Maneni court nungi meter 1.15 (3.8 feet) dang ajungketer service aotsüba asaya yimya tasen ya iba asayamung nung tendangtsü.