All England Open: Sindhu aser Prannoy quarter tongtetogo

Birmingham, Metsüremi 16 (Agencies): All England Open badminton asayamung nung tanabuba round Yangtepnü (Thursday) asayaba sülen India nunger rongnungi World No. 3 nung alila Pusarla Venkata Sindhu aser World No. 16 nung alisang Prannoy Haseena Sunil Kumar na dang anünga lir. Kechiyong India nungi asayar Kidambi Srikanth, Satwiksairaj Rankireddy, Chirag Shetty, Pranaav Chopra aser Sikki Reddy nunger iba asayamung nungi tsükogo.
Iba badminton asaya nung India tsür Sindhu-i anogo anabuba atonga asemben tashi asayatsüsa aküm aser tanabuba round asaya nung lai Thailand tsür Nitchaon Jindapol madak kokteta lir. Mezüngbuba asaya nung Sindhu-i kanga ayonga point 21-13 agi takok angu aser asaya tatemi Jindapol madak point timba ngua tembang.
Iba asaya tanabuba round nung World No.11 nung alila, Jindapol-i asaya yimya melenshia asaya aser Sindhu madak point 13-21 agi koktet. Tena tsüngta toktepa ya tasembuba round tashi nung liasü aser iba asaya matemdang Sindhu-isa anu point timba ngua Jindapol jakdang liasü.
Tena tsüngta tasembuba round asaya aodang Jindapol-i point 16-12 ngua Sindhu-i takok angutsü teimla meli kümadok. Ajisüaka Rio Olympics nung silver medal angula, Sindhu-i kanga bendanga agüja asayar ‘straight point’ pungo ngutet aser la tejaklen liasü. Quarter-final asaya tongtetsüsa, Sindhu-i tasembuba set nung Jindapol madak 21-18 agi akok aser lai Japan tsür Nozomi Okuhara den asayatsü.
Iba kasa asayamung tebur asaya nung India nunger Prannoy-i Indonesia nunger Tommy Sugiarto madak 21-10, 21-19 agi takok ngua quarter-final tongtetogo.