All Nagaland Hindi Teachers Union Silver Jubilee among

Kohima, Yimpoksüi/November 22 (TYO): Yimpoksüi/Nov. 22, 2018 nü Indira Gandhi Stadium, Kohima nung All Nagaland Hindi Teachers Union (ANHTU) Silver Jubilee mong nung okila jembidang Nagaland Angh, PB Acharya-i Hindi tesayurtem dang, state nung Hindi oshi ajungkettsütsüla, kechiyong iba oshi ya communication medium ka lir aser iba ya ajanga linük nüburtem longjemtsü atema apu latsütsü, ta ashi, ta tanü PRO to Governor sangdong ka ajanga metetdaktsü.
Angh, Acharya-i, tejakleni aotsü atema lenmangji shisaliok lir, ta shia ANHTU-i Hindi angazüktsü atema kaketshirtem ajungmesoba atema pelaba metetdaktsü.
Pai ashiba agi, shisaliok indang tongti nükjidongji nüburtem nem shisatsü ajanga tashi agutsütsü aser ibaji ajanga loktiliba aser linük tashi itdaktsütsü atema lir; yamaji linük yangerba nung tesayurtemi tongtibang shilem ka agir.
Angh-isa, tang shisaliok tsütsü o entepba nung tesayurtem indang Union tem ji kanga tongtibang aser parnok tebilemtsü onüktemji angatettsüla, koba ajanga kaketshirtem dang ajangzüktsü, ta ashi.
Acharya-isa Naga nunger kaketshirtemi linük oshi angazüktsü jangraba atema pelaba shisem.
Kasa sentong nung Principal Secretary School Education, Menukhol John-i, Hindi tesayurtemji school atema kanga senti lir, kechiyong parnoki English-a ajunga meteta lir, ta ashi.
Paisa Hindi tesayurtemi takar oshi rongnung ka sayutsü atema shimba atema pelaba lemsatepba den külemi parnoki dang ano tejangraba tulu nung sayutsü atema asüngsashitsüla, ta ayongzük.
Silver Jubilee sentong nung state kübok district balala nungi Hindi kaketshirtem aser tesayurtemi ken aten. Angh-i Jubilee nüngshilong aser Jubilee souvenir sayatsü.
Vice President ANHTU, Ruchunlo Tep-i lokti pelaa agizükba o jembi; Pastor Kelly Tsela-i sarasadem aser President ANHTU, Rometo Sema-i tepela anküp o jembia liasü.