All-rounder tem rongnung Jadeja temaba jenjangi tuogo

Dubai, Aami/June 23 (Agencies): Bodhbarnü sayaba ICC Men’s Test Player Rankings nung South Africa nunger wicketkeeper-batsman Quinton de Kock top 10-i iogo. ICC World Test Championship series nung St Lucia nung West Indies den asaya run 158 agi akokba asaya nung pai run timtiba yangluba sülen pa top 10-i iogo. Iba sayamung South Africa-i 2-0 agi kokogo.

Kasa mapang nung all-rounder tem rongnung taoba West Indies captain Jason Holder point 28 tejemba küma Ravindra Jadeja sülen tanabuba jenjangi asepzüka aluogo. India nunger left-hander shiba 2017 küm August ita sülen tang mezüngbuba No.1 jenjangi tuogo, pai rating point 386 ngutetogo, koba Holder dang nungi point ana agi timba lir.

De Kock-i mezüngbuba innings nung run 96 yangluba sülen pa jenjang ana tejakdangi tua 10buba nung lir. Ita 18 tsüngda pa tang mezüngbuba top 10-i iogo. Arishi küm 28 tain wicketkeeper-batsman shibai pa indang career nung jenjang trokbuba tashi tongteta lir, pa 2019 küm December ita tatemsa top 10 nung liasü.

Maneni Bodhbarnü sayaba ranking nung SA captain Dean Elgar-a jenjang ka tejakdangi tua jenjang 19buba tongtetogo. Pai run 77 yanglua liasü. Rassie van der Dussen-a jenjang 31 tejakdangi tua 43buba tongtetogo. Pai tanabuba innings nung run 75 yanglua liasü.

South Africa nunger bowler tem rongnung player of the match Kagiso Rabada-i wicket pongu agiba sülen jenjang ka tejakdangi tua jenjang trokbuba tongtetogo aser spinner Keshav Maharaj, shibai tanabuba innings nung küm 61 tsüngda South Africa nunger asayartem rongnungi mezüngbuba Test hat-trick agia liasü, pa jenjang asem tejakdangi tua jenjang 28buba nung lir. Pai iba asaya nung wicket tenet agia liasü. Lungi Ngidi-a jenjang 41buba tongtetogo.

West Indies nunger batsmen tem rongnungi Jermaine Blackwood-i run 49 aser 25 yangluba sülen jenjang 44buba tongtetogo aser Shai Hope (82) aser Kieran Powell (94) nata tejakdangi tuogo.

Fast bowler, Kemar Roach-i wicket tenet agiba sülen pa bowler tem rongnung jenjang 12buba nung lir. Kyle Mayers-i innings anaprongla nung wicket asemsem agiba sülen pa jenjang 51 tejakdangi tua jenjang 53buba tongtetogo.