All Ward Union Mokokchung-i aibelenertem aputsü akhanger

Mokokchung, Yimpoksüi/November 02 (TYO): Mokokchung jila ya tesünep meimba jila ka lir, aser iba jila amokmerentsü atema inyakbabo magizüktettsü, ta All ward union Mokokchung (AWUM) President, R.Ayim Longkumer aser Secretary, Lanumeren nati sangdong ka ajanga metetdaktsü.
Mepetmesü anema nokdaktsüsa Mokokchung sensotem akhang-akhanga nokdaka lir aser longjema lir, ta kasa sangdong nung shia lir.
Tawa Mokokchung Market nung anüngdang mejangjaba nisungtemi mita ao, aser item ama tatalokba osangji Mokokchung jila sensotem atema mangmangtettsüsa lir, anungji iba tatalokba ajanga tenük lapoker kanga kümküma alitsü nüngdaker, ta parnokisa metetdaktsü.
Iba dak sendakba nung AWUM-i ozüng benokba agency tem dang tekaraba nung aibelenertem aputsü akhanger, ta shidi ka ajanga Mokokchung Deputy Commissioner dang mepishia metetdaktsü.
Iba maparen nung AWUM-ia MCCI den akokba tashi amalitepa inyaktsü, ta AWUM-isa metetdaktsüogo.