Allahabad Kumbh Mela nung Naga nungertemi shilem agitsü

Kohima, January 14 (TYO): Nagaland nungi nisung 373 tashi Uttar Pradesh nung Allahabad Kumbh Mela nung adentsü atema aotsü.
January 22 aser 24 tsüngda Naga nunger teshimtet teloki iba benjung nung shilem agitsü. Parnok ya Sanskar Bharati Nagaland (SBN)-i yariri aser Ministry of Culture ajanga senotsü teyari agütsür.
Allahabad Kumbh Mela ya January 12 nungi tenzük aser March 3 tashi amungtsü. Allahabad nung ayonga amungba Mela ya UNESCO indang Intangible Cultural Heritage nung züngoka lir.
Osang angazükba agi, NE state tem nem ‘Apna Poorvottar Pavillion’ yanglutsü atema ali acre 2 shi lemzüktsüogo aser Naga nungertem indang sobaliba sayutsü atema ‘Morung’ ka yanglua lir.
Iba Mela nung linük 192 nungi nisung crore 20 shi ka arua shilem agitsü imlar.
Onoki India kübok state shia nung art & culture ajungketnür ta SBN state coordinator T Amenla Jamir-i ashi.
Sanskar Bharati Nagaland (SBN) ya Nagaland nung tenteter küm 10 shi ka lir saka yaküm July ita nungang SBN indang core committee ka tentet. Iba luden nung wadang balala nungi züngsem 11 dena lir, ta laisa metetdaktsü.