Alok Verma-i Jan 27 nungi CBI Director inyaktsü

New Delhi, January 24 (Agencies) : Republic Day sülen anogo ka lir CBI Director-designate Alok Kumar Verma-i mapa benloka inyaktsü imlar.
Verma-i January 26 tashi Delhi Police tanishir ka ama inyaka security maparen ketdangsüa reprangtsü aser January 27 nü pai CBI Director mapa benzüktsü akok.
Republic Day nung security dak sendakba maparen nung Delhi Police-i tongtipang shilem agir aser parnoki linük yimtiba anüktsü atema police 40,000 shi mapa lemzüktsür.
“Verma-i January 27 nü CBI Director menden agizüktsü akok” ta Home Ministry ketdangser kati ashi.
Verma melena Delhi Police nung tanishir shiba shimtsü ta osangbeneri asüngdangdang, centre sorkari January 27 nü ibaji lemtettsü ta ketdangseri langzü.
January 19, 2017 nü Central Bureau of Investigation (CBI) nung taruba Director inyaktsü atema Verma shim.
Pa ya Arunachal Pradesh-Goa-Mizoram & Union Territory (AGMUT) cadre nungi 1979 batch officer ka lir.
Taoba CBI Director Anil Sinha-i yaküm December 2 nü küm agi tonger mapa nungi anisüngzük.
Alok Verma-i küm 36 tashi police officer ka ama inyaka arudang mapa balala inyakogo aser CBI director ka ama inyakbaji pa atema posting 24 buba liasü.
Verma-i December 24, 1979 nungi Delhi Police nung Assistant Commissioner of Police (under training) ama tetsüng ajemoka inyaktsü tenzük aser tesüiba ita 11 tashi Delhi Police tanishisang ama inyaka arur.