Alu nung metsü aser mozü mamshitsüla: Samir Bordoloi

Dimapur, May 04 (TYO): Tanü asenoki bazaar nung alia achiba aonsutsü, süngjanglijang, shi aser ango ajunga ya mozü amshia züsentetba aser metsüba chiyongtsütem lir, anungji temang asoshi item mozütemji miim lir, ta tanü Dimapur nung Aor teintet lanurtem den sensaksemdang Assam nung Agri scientist aser aluyimer, Samir Bordoloi metetdaktsü.
Chiyongtsü tekaratiba nung züsentettsü, topur junga angutsü aser mapang talangka tamajung mekümi ayutsü asoshi mozü tapu balala amshir aser item mozütemji chiyongtsü nungji keta adoker, anungji itemji temang asoshibo miim kümadoker, ta paisa metetdaktsü.
Ibayongji, tanübo nisung shiai chiyongtsü pei peribo peisasa züsentettsü merangtsüla, ta Samir-isa ajungshi.
Iba shisalemsatepba mapang aluyimertemi alu nung ayi südaktsütsü asoshi metsü amshiba ajanga takoksa adoker asü ta asüngdang dang, “Hau, metsü jagi ali temo raksatsür, anungji tanaben alu ayimdangbo majungtsü. Ali ya asenok meyong masü saka asen chirnurtem dang nungi khen apua amshirba dang lir, anungji parnok nem meyipa agütsü dang ali temo shitak keta ali tajung agütsütsüla,” ta Samir-isa metetdaktsü.
Paisa ashiba agi, Naga lima nung mozü aketba süngolio aser aonsutsü tajung aika lir, anungji itemji mozü mamshii züsenteta achitsü aser ayoktsü sentong yanglu tenzüktsüla.
Ali temo melena mozü amshiba anendaktsünüa ashidang, asenoki asen temeket nung aliba süngolio ya bendena ali kiyi amshia ali temo yanglutsüla. Ali kiyii ya tanga len nungi bener aruba alia mamshiyonga somomodong anasa angutsü aser ali temo yanglutsüba ya senotsü endoka masü saka süngküm aser aou agi atsüdanger yanglubasa tajungba ta paisa ashi. Asenoki süngolio bendena shirepdaktsüba ali temoji seret oa sen tasak agi tangari alir, ta Samir-isa metetdaktsü.
Paisa asenoki tsünüba aonsutsütem agi chiyongtsü tamen küma yanglur tangaleni bener yoktsü sentong yanglua inyaktsü atema mozü mamshii aluyimba nung temulung agütsütsü mapang tongogo, ta paisa metetdaktsü.
Farmer Samir Bordoloi tesem balala nung aluyimertem dang masü saka kaketreju nung kaketshirtem ajurua shisalemsatepa jajadagi.