Aluyimba nung terenlok tali nüngdaker: Assam CM

Guwahati, February 09 (Agencies): Aluyimba nung ali temo wazüka ayuba aser tzü lenmang junga lapoktsü asoshi Assam Chief Minister, Sarbananda Sonowal-i tanü aluyimertem ajungshi.
“Aluyimba nung terenlok tali kümdaktsütsü asoshi sorkari aluyimer nem teyari agütsütsü molunga lir,” ta Sonowal-i FFCSWR-2017 nung jembidang metetdaktsü.
India Ato Kilonser, Narendra Modi-i North East ya mozü mamshii tsünüsempongtsü züsentetba tesem ka kümdaktsütsü nükjidong aliba ya atalokdaktsütsü asoshi state sorkari taküm budget nung aluyimertem asoshi sentong aika inoka yanglu, ta paisa ashi.
“Chief Minister’s Samagra Grammya Unnayan Yojna (CMSGUY) ya state nung aliba yimtsüngtem rongsenkettsüng nung tashi tali aittsü asoshi terenlok balala bener arutsü atema tenzük,” ta Sonowal-isa metetdaktsü.
Tourism ajanga yimtsüng rongsenketsüng renloktsü asoshi sorkari jangrar, ta paisa shisem.
State nung aliba district aika nung mapang balala nung tsünüsempongtsü tapu balala amshiba aluyimertem dang parnoki inyakba nung takok anguba aser ajangshiba metettsü asoshi sorkari tsüngdong oa parnok den jembitsü sentong aliba, pai shisem.
Tsüngsarosa mapang amshitsü asoshi tsünglutzü bendenba aser tzü kümdanga amshitsü asoshi tesayuba balala agütsütsü asoshi, Sonowal-i soil conservation department dang ajungshi.
2002-03 nungi 2012-13 küm tsüngda India ajunga nung aluyimba nungi income aruba ya shilem 5.2 liasü aser Assam nung aluyimba nungi income aruba ya shilem 0.88 dang liasü, aser agricultural scientist tem dang aluyimba nungi income tali arudaktsütsü asoshi asa-lentong tasen yanglua aluyimer nem agütsütsü asoshi Sonowal-i ajungshi.