Aluyimer crore 1.1-i Kisan scheme nguogo: PM Modi

Kanyakumari (Tamil Nadu), March 01 (Agencies): Tanü Congress party aija Ato kilonser, Narendra Modi-i, nüburtemi kibong kati yimsüsüba masü saka ochishiba dang aginer, ta ashi.
Tanü Tamil Nadu kübok Kanyakumari nung project aika tenzüktsüba den project aika atema lung azüngtsüba sentong nung jembidang Modi-i, “Tasütait pilot Abhinandan ajanga India nunger ajak nüma tangteter,” ta ashi.
Paisa, Pradhan Mantri Kisan Samman Nidhi Yojana scheme kübok linük nung aluyimer crore 1.1 dak temai mezüngbuba instalment nung sen 2,000 nguogo, ta ashi.
“Aluyimer crore 1.1 dak temai parnok indang bank account nung mezüngbuba instalment nguogo. February 1 nü sangdongba scheme ka kasa ita nungsa atangji nung atalokba ya nenoki amangteter asü,” ta pai ashi. 2014 mezüng mezüng küm 30 tsüngda par party-i Parliament nung majority angu, ta pai ashi.
Paisa, “BJP nem vote agutsüba ajanga nüburtemi kibong kati yimsüsüba masü saka ochishiba dang aginü. Nüburtemi terenlok aginüa liasü,” ta ashi.
Kanyakumari nungi video conferencing ajanga Ato kilonseri Tejas Express train tenzüktsü; iba train ya Madurai nungi senzütsü.
Tejas Express ya Chennai nung aliba Integral Coach Factory nung yanglu aser iba ya “Make in India” tatishitsü ka lir, ta pai ashi.
“Ni train tekaratiba Tejas tenzüktsüogo, aser iba train ya modern train rongnung ka lir. Chennai nung aliba ICF nung yangluba train ya Make in India tatishitsü ka lir,” ta pai ashi.