Aluyimertem ajungshitsüla

Nisunger tashitemetet agi anüng petinu nung tua aliyonga chibo chi chiyonga alitsü, anungji nisung ajak peria ali nungi chiyongtsü züsentettsübaji nisung ajak asoshi temulung agüja inyaktsüba mapa ka asütsü. Tanü rongsen bushiba lima nung nisungtemi sen dang bushir saka shingaia alu mayim ajaki sen dang bushira sen ki sünga yur aya agi asütsü. Iba nüngdakji meteta takokeribo alu tulu ayimtsüla aser alu tulu ayimtsü makokertemi pei peribosa züsentettsüsa alu tilalabo ayimtsü ajungshiteptsüla. Aji oda, alima nung alirtem asoshi chiyongtsü züsentettsü atema alu ayimtsü kanga nüngdakba agi government kübok aluyimba tapu balala repranga yariteptsü atema department aika lapoka lir. Item department-tem jagi aluyimertem nem alu tajungba ayimtsü asoshi tesayuba agütsütsü aser government-ia lenmang tapu balala nung yaritsü asoshi küm shia sentong yanglur. Ano, aluyimertem tajangzük ngudaktsütsü asoshi mapang mapang shia government-i alima tesem balala nungi pei pei lu nung züsentetba chiyongtsü ayoktsü aser tangar danga alitsü asoshi sentong yanglur. Iba ama sentong mapang aluyimertem rongnung alu tajungba ayimtsü asoshi shisalemsateper aser alu nung züsentetba chiyongtsü ayoktsü aser alitsüba lenmang angur. Talisa, Nagaland ama tangar aluyimertem dak dang nendaka aliba state aser nübortem asoshi aluyimtsü tasa tajungba sayutsü aser aluyimtsü jangradaktsütsübaji kanga tongtibang lir. Atangji, meranga inyaktsüla saka alu ayimtsüba mapa ya tanü putu nungbo kanga tasakbo masü. Akhidangbo, anü agi pua tsünglu agi ajaa alu inyak, aser iba jagia tebok masüng. Ajisüaka, tanübo temang raksaa masü saka mapang meteta aser aluyimba hadir aser gari dena amshia alu ayimer. Aji oda, lenden tashi nung tsük lu ayimtsü aser tekong tashi nung süngjang lu, aonsutsü lu, süngo lu aser ano alu tapu aika yima otettsü. Iba nükla nung government-i aluyimba nung temulung kanga agütsütsü mapang tongogo. Tangbo, aluyimba tsütsü Nagaland nunga department aika liaka department-temi aluyimertem yaria alu ayimba aser alu nung züsentetbatem tangaleni yoktsüsa lenmang sayuba mangur. Mapang kabo Dimapur nung tanga state nungia government aser private company-tem jaoka Agri Expo sentong ayongzükasa lia aruogo. Ajisüaka, tanübo Nagaland nung Agri Expo ama aser Road show ama aliba mangur. Item ama sentong ayongzüka akabaji aluyimertem asoshi kanga tajangzük liasü. Iba ama mapang nung alu junga ayimtsü asoshi shisatsü aika angazüker aser ano pei lu nung züsentetba chiyongtsüa tangari chidanger aser joko teti atema talirtem dena lenmang lapoka ayur. Asen government nung aluyimtsü sentong aser sen aliyonga mapa küma meinyaktetbaji asenoki alu shitakba yima asen lima takar akümtsü meranger masü saka aluyimba aser aluyimertem tenüng nung sen agizüka achitsü dang bilemer aser yamaji inyaker. Tangbo joko iba shisatsüji melentsüla aser asen lima nung züsentetba agi India nung dang masü saka alima ajunga sapua achitsüsa asenoki alu ayim tenzüktsüla. Asen lima nungbo aluyimer tetezü sensaker saka iba tetezüjia dena melener aluyimertem ajak pei lu nung züsenteta ayokba agi takar akümtsüsa aluyimba nung temelenshi tulu adoktsü kanga nüngdaka kümogo. Item ajakji tanü lanurtemi melamelaa inyaktettsü. Aji oda, asen lima ya aluyimba lima ka akümtsü asoshi lanurtem dang alu ayimtsü nüngdakba indang angatetdaktsütsü aser aluyimba ajanga tajangzük angutsüba lenmangtem sayutsü. Idangjibo, aluyimertem ki tajungba aser gari tajungba asütsü. Idangjibo aluyimertemiang arogo, lokti aser yimten nem tenla tuluba agütsütsü. Idangjibo asenok talir masü tayoker asütsü. Iba mangdang ataloktsü asoshi government-i Naga nungertem nem aluyimtsü tasa aser teyari shitak agütsütettsüla.