Aluyimertem rongsen anasü agi tali aadaktsütsü: CM

Imphal, Rongchii 19 (Agencies): Manipur Chief Minister N. Biren Singh-i ashiba agi, state sorkari 2022 tashi nung aluyimertem rongsen aaba anasü agi timba kümdaktsütsü asoshi inyak tenzükogo.
City Convention Centre, Palace Compound, Imphal East nung tanü “One-day State Level Workshop on Biodiversity and Sustainable Agriculture for Doubling of Farmers’ Income” sentong nung ojembiba mapang nung pai iba olen ya shia liasü.
Biren-i ashiba agi, aluyimertem sen anasü agi timba adaktsütsüba sentong ya aluyimba yimya nung mekongshi alibatem ajak asadanga tajungtiba agi inyaksangshiba ajanga dang koktettsü.
“Tenem lima nung tesem aika mekongshi lir,’ ta pai ashi. Paisa item tesemtem nung technology shidak benshia alu nungi adokba tali kümdakja aluyimba yimya ya tetoktepba yimya ka kümdaktsütsüla aser iba ya khen atema dang masü saka teti atema rongsen aaba lenmang ka kümdaktsütsüla.
“Asenoki horticulture aser animal husbandry nunger amala high value agriculture dak ajemdaker aluyimba yimya ya ajungkettsüla,” ta pai ashi.
Kasa mapang nung paisa ashiba agi, tanga advanced State tem ama Manipur nung industry tem tulu mali aser farmer tem rongsen aatsüba lenmangji timba aluyimba ajanga dang lir.
Maneni Chief Minister-i ashiba agi, state nung tzünglubo peria arur saka tzü rizünga ayutsüba atema asalendong shidak maliba ajanga asükwa nungbo Manipur nung tzü agi anünger.
Iba ya temulungdang yur sorkari state tesem balala nung tzü rizünga ayutsüba atema tzübo amala yangluyonga arudar. Item project tem tembangba sülen asükwa tsünüba tsünüsempongtsü balala atema aluyimertem nem tzü peri agütsütsü, ta paisa ashi.
Paisa iba workshop nung tebilemdangba balala benokdangba ya sorkar asoshi sentong balala yangluba nung teyari tulu asütsü, aser iba ajanga tarutsü nung state nem aser talisa aluyimertem nem teyari agütsütsü, ta ashi.
Iba workshop ya Manipur sorkar aser Central Agricultural University, Imphal puri sentepa ayongzük.