Aluyimertem sentsüh atoktsüla: Yechury

New Delhi, November 24, 2016: Brihostibarnü New Delhi, Jantar Mantar nung All India Kisan Sabha züngsemtemi sorkari sen tamshidak notes anentsüba anema ‘Save Agriculture, Save Peasantry, Save Country’ rally nung shilem agiba noksa nung angur. 

New Delhi, November 24 (Agencies): Brihostibarnü New Delhi, Jantar Mantar nung aluyimertem senden ka nung jembidang CPI(M) General Secretary, Sitaram Yechury-i, Modi sorkari aluyimertemi sen apua aliba sentsüh atoktsüla, kechiyong parnoki corporates sentsühbo tokogo, ta ashi.
Modi sorkari sen tamshidak anentsüba aija Yechury-i, “Sorkari sen auyartembo kümzüker saka sensakertem nem temerenshi agütsür, kechiyong banks aser ATMs kima tarensen nung nokdakdang sensaker nisung 74 dak tema süogo,” ta ashi.
CPI (M) aluyimertem wing, All India Kisan Sabha-i ayongba lokti senden nung Yechury-i, “Taoba küm ana nung sorkari capitalist tem dang sen loan 1.2 lakh crore tokogo saka sensakertemi apuba loan bo atoktsü memelunger. Sensakertemi loan agia alibaji sorkari atoktsüla,” ta ashi.
Linük nung aluyimertem timtemba dak sentakba nung Yechury-i, “Modi sorkari sensakertem tesensakba kümdaktsür aser takartem takarba kümdaktsür,” ta ashi.
“Sorkari, parnoki Pakistan dang lesson ka sayuogo ta ashir, saka asen sepaitem arrtsü nung tepsetdaktsür. Aluyimertem soseta asür. Modi sorkar kübok aluyimertem soseta asüba shilem 26 agi timba kümogo,” ta paisa shisem.