Aluyimertemi sorkar lenmang mejungi aliba yanglutsü

Dimapur, November 15 (TYO) : Mokokchung nungi Tuensangi aoba lenmang nung Chuchuyimpang nunger lushi nung kongshia aliba kilometre 5 Ashini Project luyimertem anogo ananü nübutsükba den külemi lenmang yanglutsüogo.
November 13 aser 14 anogotem nung iba tesem nung aluyimer kibong 30-i angati nübu tenla mapa inyak.
Iba lenmang ya oli orartem asoshi kanga dang tongtipang lenmang ka aser Tuensang-i aoba lenmang ya kanga agi tatsüba asüba agi tongtipangsa Tuensang-i aortem timba iba lenmang nung senzür. Iba jagi lenmang ya yanglutsü nüngdaker ta reprangteta Chuchuyimpang nunger Ashini Project luyimertemi lenmang yanglutsüogo.
Iba lenmang yangluba maparen inyakdang NPF Mokokchung Division President Wb. Moasangba Jamir-i Excavator angati tenlaba den ano anogo ananü mapa inyaker ajak apokatsü peria agüja iba ama nübur yariba takok tulu ngua inyaktetdaktsüba asoshi Ashini Project luyimer tenüng nung NPF Mokokchung Division President dang tepelaba Wb. C. Imli Jamir-i sangdong ka nung metetdaktsü.