Aluyimertemi ‘subsidy’ angutsü bilema alu mayimtsüla: Kikheto

Kohima, Oct 6 (TYO): Nagaland nung coffee lu ayimertem dang government nungi subsidy angutsü imlaa masü saka shitakba alu nungi tajangzük keta züsentettsü bilema alu ayimtsüla ta Land Resources department nung Secretary, Y Kikheto Sema, IAS-i metetdaktsü.
Tanü Brehostibar nü World Coffee Day amongba sentong ka Coffee Board of India (CBI) den külem ser Land Resources Department (LRD)-i yangi Kohima nung ayongzüka amongba mapang, Wb. Y. Kikhetoi Coffee lu ayimertem dang coffee dong tajung angutsü aser aluyimbaren nung akok tashi technical maparen nung yaritsü ta metetdaktsü.
“Department mapa nungbo opposition mesüra ruling pur ta kecha malitsü saka coffee lu junga yimtettsüba lu aser aluyimertem dang repranga inyaktsü, kechiyong department nükjidongjibo coffee lu junga yimdaktsütsü asoshi lir ta paisa metetdaktsü.
Iba nükjidong ataloktsü asoshi aluyimer aser yimtaklirtem ajak tangatettep nung yaritepa inyaktsüla aser coffee dongji tangar nungi masü saka Coffee Board mesüra Land Recourses department nungi alitsüla, ta paisa ashi.
Naga nunger mapang talangka government-i agütsüba teyaritem dak dang metaloker aruba agi, joko teti asoshi pei ajangzüktsü asoshi masü saka subsidy angutsü asoshi bilema dang alu ayimer, iba jagi alua junga meyimtetter aser timtema dang alir, anungji iba ama yimya sübaba jakla tamajungji endoker, tangbo tangar dak dang metaloka melii peisasa pei nokdaktettsüsa inyaktsüla ta Wb.Kikhetoisa metetdaktsü.
Naga nunger nem alitemo aketba li moaja lir asünungji, iba li nung rongsen adokdakja tangar tsüngdang akümket alitsü asoshi bilema inyak tenzüktsüla ta paisa ashi.
Nagaland ya coffee lu ayimtsü tetemsü tesem ka lir, iba jagi alima nung coffee tajungtibaji Nagaland nung züsentettsü koka lir, anungji coffee lu ayimba tajungba angazüka yimtettsü asoshi tan ita nung Land Resources department nungi ketdangsertem anir Karnatakai aotsü aser anogo ishika coffee lu nung monger arutsü ta paisa metetdaktsü.
Iba sentong nung tongti tesemdanger LRD secretary den CBI ketdangsertemi World Coffee Day 2016 amongba tenüng nung Nagaland coffee jemdanga liasü.